杜畿

杜畿（粵拼：dou6 gei1；163年—224年），字伯侯（baak3 hau4），京兆杜陵人（而家陝西西安），係東漢末年、三國初年嘅人，入仕曹魏，做咗佢嘅官員同將領。佢出身京兆杜氏，有仔杜恕，有孫杜預、杜斌。

杜畿
曹魏 官員、將領
生	163年 京兆杜陵
死	224年 許昌陶河
活躍時期	182年～224年
繼任	杜恕（豐樂亭侯）
仔女	杜恕 杜理 杜寬
遞啲名
字	伯侯
諡號	戴侯

生平

早年

杜畿係漢朝御史大夫杜延年嘅後人，世代住喺杜陵。杜畿細時就冇咗老豆，後底乸對佢好惡，不過杜畿仲係好孝敬佢，於是佢以孝聞名。

19歲時做咗所在郡嘅功曹，又做鄭縣嘅縣令。當時縣嘅監倉度韞住幾百人，杜畿親自去監倉爲佢哋裁決，就算唔係人人都裁決妥當，郡度啲人都話佢年紀輕輕咁有大志。後來舉爲孝廉，做漢中府丞。東漢末年時天下大亂，杜畿於是棄官走咗去荊州，直到建安年間先返去北方。喺荊州幾年，後母過世，當時京兆地方稍微安定啲，佢就孭佢後母北歸。半路遇賊，周圍啲人都散曬，唯有杜畿唔走，啲賊想射佢，杜畿話：「你都係想要錢嗟，我都冇錢，射我做咩呢？」，啲賊放過佢。杜畿返到鄉里，當時嘅京兆尹張時同佢係舊相識，於是又起用佢做功曹。不過張時覺得以杜畿嘅性格唔啱做功曹。杜畿私底下就話自己唔啱做功曹，啱做河東太守。

之後杜畿去許昌，去見耿紀，同佢傾咗成晚偈。當時做尚書令嘅荀彧住喺耿紀隔籬，夜晚聽到杜畿嘅言談，覺得好驚異，遞朝派人同耿紀講：「有咁好人才唔舉薦，又坐咩高位呢？」荀彧見咗杜畿後好讚賞佢，於是舉薦佢畀曹操。曹操任命佢做司空司直，之後改任護羌校尉，使持節做西平太守。

河東太守

曹操平定咗河北嘅袁氏後，并州嘅高幹又造反。當時嘅河東太守王邑調去遞度，河東人衞固、范先以請返王邑返來爲名義同高幹勾結。曹操問荀彧：「關西諸將憑住險要兵馬，一定會作亂，張晟喺殽、澠一帶有兵馬，向南會聯通劉表，衞固呢班人會因噉嘅時勢而攪事，我實在驚。河東一帶係當今天下緊要之地，有咩人可以鎮守嗰度？」荀彧就向佢舉薦杜畿，話佢夠勇有智，足以應變當難。於是杜畿做咗河東太守。

衞固派出千人阻斷陝津，令杜畿過唔到河。曹操派夏侯惇討伐佢哋，當時大軍未到。當時有人同杜畿講呢下要支大軍先搞掂河東，杜畿話：「河東呢三萬戶人，唔係個個都想作亂嘅，只不過係畀佢哋威脅，驚先至聽衞固話嗟。衞固肯定會作戰到底，打唔贏佢，周圍啲人會支援衞固，叛亂平息唔到；打得贏佢，成個河東郡都殘曬，盞害咗啲人。我哋出其不意直接去佢度，衞固多計但唔決斷，必定扮接受我哋，之後再諗計啦。」於是杜畿兜路從郖津過河。

范先想殺咗杜畿來威嚇啲人，於是特登喺杜畿來到時，喺城門度斬殺主簿等三十幾人，不過杜畿好鎮靜。衞固就話：「殺佢冇益，盞整臭名，何況我哋可以牽制住佢。」於是佢哋迎接咗杜畿。杜畿初初到都重同佢哋好說話，重畀衞固做都督、功曹，而三千幾人嘅士兵交畀范先督軍。衞固、范先就開心嘞，表面上聽杜畿話，但實質唔當回事。

衞固想大發兵，杜畿勸佢話：「若唔係急事，唔可以咁勞師動衆。而家大發兵肯定驚擾到啲人，不如慢慢噉用資金來募兵。」衞固聽咗佢啲話，使資金用幾十日時間募兵，諸將調出作爲杜畿嘅援軍；之後杜畿又話：「啲人顧家，先遣散啲人返屋企休息先，有急事再召集都唔難。」衞固唔想忤逆人心，於是又聽咗佢話，結果自己嘅兵員分散咗。當時張白騎攻打東垣，高幹打濩澤，上黨各縣殺長官，弘農捉咗郡守，噉嘅形勢令衞固想秘密調兵。杜畿知河東各縣都依附佢，於是帶幾十個騎兵出城防守，各縣嘅人都出來幫佢，數十日就籌集到四千幾人。衞固同高幹、張晟一齊攻打杜畿，但攻唔落，想搶各個縣又搶唔到。曹操嘅大軍一到，高幹、張晟失敗，衞固等伏誅，啲餘黨都赦免佢哋。

當時天下郡縣都殘破，河東最先安定，所以受嘅破壞算輕。杜畿治理河東，用嘅係無爲而治嘅手法。啲人有咩訴訟，杜畿親自見佢哋，同佢哋講道理，嗌佢哋返去諗下先，真係咁不滿先再告官。啲鄉親父老就話：「有咁好嘅長官，又點唔聽佢話呢？」於是當地嘅訴訟少咗好多。又喺縣度提舉啲孝子、貞婦、孝孫，免佢哋服役，經常慰問佢哋。又鼓勵民衆養牛、馬、家禽家畜，啲民衆勤奮務農，所以家家生活豐實。杜畿話生活富足就要開始文教，於是講武授學，開學宮親自教書，於是河東出咗好多學者儒士，博士樂詳就係由杜畿提拔嘅。

韓遂、馬超反叛曹操，弘農、馮翊等地都響應佢哋嘅反叛。河東雖然同佢哋相接，但啲民衆無造反嘅心。曹操西征佢哋時，啲軍糧全靠河東供應。等到曹操征服曬佢哋後，重淨糧草二十萬斛有多，曹操就話杜畿好叻，獎佢俸祿二千石。曹操征服漢中時，派河東五千人做運輸，啲人話唔可以辜負杜畿長官嘅託付，所以呢個徭役嘅過程中無一個人逃亡，杜畿就係咁得民心。魏國建立後，召杜畿做尚書。杜畿喺河東治理咗十六年，令當地成爲天下第一郡。

朝中任職

曹丕升做魏王後，召杜畿做尚書，賜佢爵位關內侯。到曹丕稱帝後，就封佢做豐樂亭侯，食邑百戶，任職爲司隸校尉。之後曹丕攻打東吳，任命杜畿做尚書僕射，統管留守事務，曹丕去許昌，亦係要佢統管留守。後來曹丕落令整樓船，喺陶河試船時，遇到強風部船沈咗，杜畿浸死喺陶河度，死時61歲。曹丕爲咗佢而喊，落詔書讚佢，追贈佢做太僕，頒畀佢諡號戴侯，由佢嘅仔杜恕繼承佢嘅爵位。

杜畿有三個仔，杜恕繼承佢嘅位，同樣做曹魏嘅官員，係三國時嘅學者；杜理細個時幾有才華，杜畿睇好佢，但20歲時就死咗；杜寬做過官，不過性格更鍾意研究學問而抗拒俗務，同士人來往比較多。佢嘅孫杜預係西晉有名嘅將領、學者，參加晉滅吳之戰。

參攷資料

• 陳壽（著）；裴松之（注）。〈魏書 — 任蘇杜鄭倉傳：杜畿傳〉. 《《三國志》》。