松下幸之助

松下幸之助（日文：まつした こうのすけ，1894年11月27號—1989年4月27號），係日本生意人兼發明家，松下電器、松下政經塾同埋PHP研究所嘅創立人。花名「經營神人」。

松下幸之助
出世	1894年11月27號 大日本帝國和歌山縣海草郡和佐村（即依家和歌山市禰宜）
死	1989年4月27號 日本大阪府守口市外島町松下記念醫院
出名原因	松下電器創辦人
仔女	松下幸子
親屬	松下正治（入門女婿） 松下正幸（大孫） 松下弘幸（二孫）

生平

早年

1894年11月27號，松下幸之助響和歌山縣海草郡和佐村千旦之木（即依家嘅和歌山市禰宜）出世，係當地一個小地主松下政楠嘅三仔，亦係最細嗰個仔，上有五個家姐同兩個大佬。因為響屋企面前有棵大松樹，所以就以此為姓，改個姓叫「松下」。

大概1899年，老豆經營米相場失敗，搞到破產，一家人因此搬去和歌山市本町一丁目。老豆響嗰度曾經開過下馱屋，但係佢唔太擅長做生意，所以又執咗笠。另一方面，幸之助因為屋企環境轉差，所以被迫輟學，到宮田火鉢店做咗契約勞工（佢仲做埋人哋徒弟）。

1910年嘅松下幸之助

後嚟佢師傅轉行做第五代單車。響呢段時間，松下留意到啲顧客過嚟幫襯嗰陣成日都要買煙食，因此佢諗到一個方法：如果佢入貨嗰陣係成批買而唔係單一一枝煙仔咁買，咁唔單止啲煙仔可以即刻到手，而且支煙嘅價錢比起一支支咁買平好多，可以從中賺個啲錢。呢個舉動令到其他學徒非常不滿，而店主亦唔支持，所以最後佢停止咗成批買。但係呢次事件令到佢留意到自己原來都有返啲生意頭腦，成為佢第日做生意人嘅契機。

佢一直對大阪市嘅有軌電車印象深刻，所以佢就以從事電呢方面嘅工作做目標。佢十六歲加入大阪電燈（即依家嘅關西電力），並且響嗰度打工七年。期間佢留意到裝電燈係要直接攞電線駁入屋企，如果要換電燈就會好麻煩同埋危險，所以佢諗到響屋企裝插蘇，直接將電燈駁落插蘇到，咁就安全得多喇。1913年，佢入讀關西商工學校夜間部預科，一邊打工一邊讀書，1915年同井植梅野（婚後改叫松下梅野）結婚。兩年後決定辭職。

創立松下

1918年嘅松下

1918年，松下響大阪府東成郡（即依家嘅大阪市東成區）聯同另外四人（其中一個係舅仔井植歳男，二戰後創立三洋電器）夾份製造同賣插蘇。一開頭銷量並唔好，所以其中兩個唔撈。後嚟松下由川北電氣（即依家嘅松下環境系統）得到大量風扇零件訂單，從此生意就越做越好。

因為業務越做越大，所以同年3月佢哋響大阪市北區西野田大開町（即依家大阪市福島區大開2丁目）創立松下電器嘅前身「松下電氣器具製作所」。由呢個時候開始，佢開始唔單止淨係賣電燈插蘇，仲賣埋自行車用電燈。1929年將公司改名叫「松下電器製作所」。

屋企

松下同其他人嘅合照，其中後面個排係松下幸之助、井植歲男、松下梅野

松下幸之助嘅細舅井植歲男（老婆梅野嘅二細佬）亦係一位生意人，當年曾經同松下一齊成立「松下電氣器具製作所」，響1947年接受公職追放之後由松下分家，成立三洋電器。而歲男兩個細佬井植祐郎同井植薰，都跟住移籍到三洋。三兄弟先後出任三洋嘅會長同社長，但最後三洋都係合併落松下。而梅野嘅妹夫中尾哲二郎都曾經短暫脫離過松下，但係收尾都係返嚟。

幸之助同梅野得一個女幸子。所以，佢認咗舊華族、兼畫家平田榮二個二仔正治做婿養子。而正治嘅阿爺平田東助係舊米澤藩武士，仲分別響第一次同第二次桂太郎內閣出任內務大臣。幸子同正治有兩個仔一個女，分別係正幸、弘幸、敦子。

另外幸之助有幾個私生仔女，而呢幾個仔女響佢死後亦分到遺產。