核心能力

核心能力（英文：core competency）係管理學理論上嘅一個概念，指一間公司喺一個特定市場當中喺資源同技能上有乜獨特之處，令間公司同對手相比有某啲優勢：公司之間喺專業知識、組織文化以及固有客源等各方面都唔同，一間公司嘅成員會喺生產嘅過程當中由呢啲嘢嗰度學習，令到唔同公司之間喺「成員擅長做啲乜」上有差異。如果有一間公司：

1. 零舍擅長做某啲工作（例：一間遊戲製作商開發射擊遊戲嘅經驗特別豐富，所以特別擅長整射擊遊戲），
2. 呢啲能力唔係佢哋啲競爭對手能夠輕易噉模仿嘅（例：開發遊戲嘅經驗往往係要用數以年計嘅時間累積嘅），而且
3. 呢啲能力能夠為啲客提供更高質素嘅貨品服務－能夠提供競爭優勢（例：因為富有經驗，能夠開發更加好玩嘅射擊遊戲），

噉佢哋嘅呢啲能力就算係佢哋嘅核心能力。管理學上一般認為，一間公司喺做策略性嘅決定嗰陣，需要認清自己嘅核心能力，理解到邊啲情況自己有能耐打低競爭對手、邊啲情況自己會輸，而遇到後者嘅情況嗰時就需要退讓，用守勢減低損失。

睇埋

• 競爭優勢
• 學習
• 專家知識