競爭優勢
競爭優勢（粵拼：ging3 zang1 jau1 sai3；英文：competitive advantage）係管理學同策略上嘅一個概念，指令到一個個體或者組織（例如一間企業）能夠成功噉喺競爭當中打低對手嘅因素[1][2]。
舉個例說明，想像家陣有兩隻牌子嘅汽水 A 同 B，佢哋出嘅產品都係「甜嘅有汽嘢飲」；一般消費者好多時都會覺得兩隻牌子都差唔多，都一樣滿足到自己嘅慾望，所以冇乜誘因偏好其中一隻牌子；又想像 A 而家好想喺場競爭入面打低 B，爭多啲客賺多啲營業額；於是佢就做研發，改變自己生產嗰啲汽水嘅成份，令自己生產嘅成本低咗，能夠以更低嘅價錢賣汽水；跟住由消費者嘅角度睇，兩隻牌子嘅汽水一樣咁好飲，但 A 價錢平啲，於是佢哋就有誘因偏好買 A 唔買 B－最後 A 嘅營業額高咗，由 B 手上爭咗一定量嘅客（打低對手）。喺呢個過程裏面，價錢就係 A 攞到嘅競爭優勢[3]。
競爭優勢呢個課題喺管理學（尤其係策略管理）等嘅商學上相當受重視。從事管理工作嘅人以至管理學者，都會思考「點樣先可以令間企業有競爭優勢」以至「競爭優勢點樣先至可以維持得耐」等嘅問題，形成咗一系列理論同實踐兼備嘅研究[1][4]。
定義概論 編輯
| 「 | 」 |
廣義上啲講，競爭優勢包含任何「由一個組織或者個體具有（而佢啲競爭對手冇）、能夠提升佢喺競爭當中爭贏嘅機率」嘅特性。舉幾個具體例子，常見嘅競爭優勢有以下呢啲[6]：
- 價錢：最簡單直接嘅競爭優勢，係以（同對手相比）更平嘅價格提供同樣嘅貨品同服務－事實表明，無論係喺世界邊個區域，消費者都會鍾意平同優質嘅貨品服務；而對企業嚟講，要達致用更低嘅價錢賣貨品服務有好多方法，包括係做研發改良自己啲技術，用更有效率嘅方法做生產（睇埋成本領導）；
- 專業知識（個人層面）：人之間都會爭好多嘢，例如喺見工嘅過程就係人同人爭搵一份工，所以競爭優勢嘅概念喺個人層面都啱用；想像家陣有個人，佢具有一啲專業知識，令佢識得做一啲冇嗰啲專業知識嘅人做唔到嘅工作，於是佢就有得去搵一啲多數人都做唔嚟嘅職位－佢嘅呢啲特殊知識就係佢嘅競爭優勢[7]；
... 等等。
可持續度 編輯
.jpg)
喺對競爭優勢嘅思考上，競爭優勢嘅可持續度[英 1]係一條受重視嘅課題；一股競爭優勢嘅可持續度係指股競爭優勢有幾容易維持，舉兩個例子說明[1]：
- 想像而家某個先進國家 A 國，A 國國內有若干間公司生產緊汽車，而 A 國嘅鄰國 B 國工業啱啱起步，所以工人嘅人工（生產成本）明顯低過 A 國，於是其中一間 A 國汽車公司就將自己啲工廠搬嗮去 B 國，等自己可以用更低成本生產汽車，然後用平啲嘅價錢賣自己嗰啲質素上同競爭對手相約嘅汽車，得到一股競爭優勢（睇埋成本領導），不過假如佢啲競爭對手喺搬廠上唔受限嘅話，呢個優勢維持唔到幾耐（可持續度低）－佢啲競爭對手大可以跟住搬廠去 B 國，然後話咁快 A 國啲汽車公司都同樣噉以低價賣自己嗰啲汽車；
- 想像而家有若干間遊戲開發商（開發遊戲嘅公司或者團隊），其中有個開發商（叫佢做 C），C 嘅團隊當中有拉爾夫呢位天才遊戲設計師，拉爾夫能夠係噉設計出第啲遊戲設計師設計唔到嘅精彩遊戲，而且佢對 C 非常忠誠，冇興趣為 C 以外嘅遊戲開發商工作，噉 C 就有一股維持到好耐嘅競爭優勢（可持續度高）－ C 嘅競爭對手因為冇拉爾夫呢個天才，所以喺開發嘅遊戲嘅質素上差過 C，而且拉爾夫冇打算幫 C 以外嘅遊戲開發商做嘢，所以 C 嘅競爭優勢會維持一段長嘅時間[8]。
一般認為，競爭優勢嘅可持續度係愈高就愈理想。一股競爭優勢要唔容易模仿，先至可以有高嘅可持續度。以下係一啲俾人認為唔容易模仿嘅競爭優勢[1]：
- 專業知識（尤其係喺個人層面）：如果一個人有一啲要用好耐時間訓練先學得到嘅專業知識，佢嘅對手就好難吓吓都模仿佢，噉佢就可以搵啲第啲人做唔嚟嘅職位，而且要搵人取代佢就難。
- 組織文化：想像家陣有一間公司，佢具有一套獨特嘅組織文化，啲員工個個都好習慣準時交貨；呢套文化能夠有效噉提高佢哋嘅工作效率，而且因為呢個組織文化好深噉嵌入咗個組織嗰度，要模仿嘅話需要做好多結構上嘅改革[9]，所以第啲公司要模仿並唔容易－呢個特殊工作文化就係間公司嘅競爭優勢。
- 顧客關係：如果一間公司能夠令啲客對佢產生好感，就有可能令到啲客肯「就算第啲公司嘅產品平啲，都繼續照買呢間公司啲產品」；亦都有營銷學工作者討論網上捍衛品牌行為等嘅現象，指出啲客如果對間公司有好感，可能會（例如）肯喺第啲消費者面前反駁有關間公司嘅負面消息，達致「幫到間公司保護佢名聲」嘅效果[10][11]。可以睇吓顧客關係管理同關係營銷等嘅概念。
- 商業情報[英 2]：廿一世紀初嘅企業可以搜集好多有用嘅數據[12]，簡單嘅有做問卷調查睇吓啲客對件產品有乜觀感同埋對件產品有乜唔滿意嘅地方；一間公司可以用資訊系統儲起呢啲數據，仲可以對數據進行分析－簡單嘅有數吓「有幾多 % 嘅客對產品 A 唔滿意？」－如果呢個 % 夠高，就決定對產品 A 作出更改；喺商業上，呢啲噉嘅數據可以用受嚴密保護嘅數據庫儲起，等外人冇得攞嚟用，而齋係「手上揸住啲對手冇嘅資訊」呢點經已可以帶嚟競爭優勢[13]。
- 商業同盟[英 3]：企業之間可以建立同盟關係，互相俾對方著數同埋合作打低佢哋嘅對手－簡單嘅可以想像兩間企業事先夾定，雙方同時各自喺市場上發放自己件新產品，而呢兩件新產品係互補品（即係消費者會有誘因同時買嗮兩件嘢，例如牙刷同牙膏噉）；商業同盟關係可以好持久－要建立或者切斷一段同盟關係，會嘥人力物力，所以只要一段長期關係起碼係有少少著數嘅，一間企業都好少可會有誘因想無端端切斷段關係或者走去建立第段關係；噉亦即係話，如果一間企業搵到靠得住嘅同盟，段關係可以係一種維持到好耐嘅優勢[14]。
... 呀噉。
睇埋 編輯
- 基本競爭策略[英 4]：基本競爭策略係由美國經濟學家米高波特[英 5]提出嘅一個諗法；根據佢嘅諗法，一間公司想要爭取競爭優勢，基本上得三大類做法－降低成本用更低嘅價錢賣產品、提升自己產品嘅質素同埋集中淨係打個市場嘅其中一橛[15]。
- 核心能力[英 6]：競爭優勢其中一個重要來源；一間公司嘅核心能力係指間公司喺個特定市場當中喺資源同技能上有乜獨特之處，令間公司同對手相比有某啲優勢；一間公司嘅核心能力主宰「佢應該用咩方法攞競爭優勢」－例如一間公司有班零舍擅長交際嘅員工（佢嘅一樣核心能力），噉對佢嚟講，「集中建立商業同盟關係」就好可能會係一套比較可行嘅策略[16]。
- 絕對優勢
- 相對優勢
- 稀缺
- 研究開發
註釋 編輯
文獻 編輯
- Competitive Advantage: Creating and Sustaining Superior Performance by Michael E. Porter.
- Creating Competitive Advantage: Give Customers a Reason to Choose You Over Your Competitors by Jaynie L. Smith.
- Using MIS by David M. Kroenke, pages 71–77.
- "Unraveling The Resource-Based Tangle" by Peteraf M. & Barney J (2003). Managerial and Decision Economics 24. doi:10.1002/mde.1126
- Erica Olsen (2012). Strategic Planning Kit for Dummies, 2nd Edition. John Wiley & Sons, Inc.
- Profit from the Core: Growth Strategy in an Era of Turbulence by Chris Zook and James Allen.
- Beyond the Core: Expand Your Market Without Abandoning Your Roots by Chris Zook.
- Unstoppable: Finding Hidden Assets to Renew the Core and Fuel Profitable Growth by Chris Zook.
- Value Migration: How to Think Several Moves Ahead of the Competition by Adrian Slywotzky.
引咗 編輯
- ↑ 1.0 1.1 1.2 1.3 Porter, Michael E. (1985). Competitive Advantage. Free Press.
- ↑ Competitive Advantage. Investopedia.
- ↑ Chacarbaghi; Lynch (1999), Competitive Advantage: Creating and Sustaining Superior Performance, by Michael E. Porter 1980, p. 45.
- ↑ When Data Creates Competitive Advantage. Harvard Business Review.
- ↑ Clulow, Val; Gerstman, Julie; Barry, Carol (1 January 2003). "The resource-based view and sustainable competitive advantage: the case of a financial services firm". Journal of European Industrial Training. 27 (5): 220-232，原版英文："A firm is said to have a competitive advantage when it is implementing a value creating strategy not simultaneously being implemented by any current or potential player."
- ↑ Warf, Frederick P. Stutz, Barney (2007). The World Economy: Resources, Location, Trade and Development (5th ed.). Upper Saddle River: Pearson.
- ↑ Chacarbaghi; Lynch (1999), Competitive Advantage: Creating and Sustaining Superior Performance, by Michael E. Porter 1980, p. 45.
- ↑ Scholz, T. M. (2012). Talent management in the video game industry: The role of cultural diversity and cultural intelligence. Thunderbird International Business Review, 54(6), 845-858.
- ↑ Edwards, R. W., Kumar, P., & Ranjan, R. (2002). Understanding organisation culture and innovation: a case study approach. In Sixth International Research Conference on Quality, Innovation and Knowledge Management held in Malaysia in February.
- ↑ Colliander, J., & Wien, A. H. (2013). Trash talk rebuffed: consumers' defense of companies criticized in online communities. European Journal of Marketing.
- ↑ Au, Cheuk Hang; Ho, Kevin K. W.; Law, Kris M. Y. (2021-07-03). "The bright and dark of consumers' online brand defending behaviors: exploring their enablers, realization, and impacts". Journal of Organizational Computing and Electronic Commerce (英文). 31 (3): 171–191. doi:10.1080/10919392.2021.1949192. ISSN 1091-9392.
- ↑ When Data Creates Competitive Advantage. Harvard Business Review.
- ↑ Dvořák, T. (2005). Do domestic investors have an information advantage? Evidence from Indonesia. The Journal of Finance, 60(2), 817-839.
- ↑ Darby, Mark (2006). Alliance Brand: Fulfilling the Promise of Partnering. Wiley.
- ↑ Porter, Michael E. (1980). Competitive Strategy. Free Press.
- ↑ Hafeez, K., Zhang, Y., & Malak, N. (2002). Core competence for sustainable competitive advantage: a structured methodology for identifying core competence. IEEE transactions on engineering management, 49(1), 28-35.