格林尼治

格林尼治（粵拼：gaak3 lam4 nei4 zi6，英文：Greenwich，/'ɡrɛnɪtʃ/ 或者 /ˈɡrɪnɪdʒ/，「w」唔發音），舊譯格林威治（粵拼：gaak3 lam4 wai1 zi6），係英國倫敦東南一區，出名格林尼治子午線，即係全世界時間嘅參照點。所謂格林尼治時間（Greenwich Mean Time，GMT）就係指呢度嘅時間。如此地位，皆因呢度係英國海軍重地。格林尼治天文台，又稱英國皇家天文台（Royal Observatory Greenwich），負責導航英國海軍。大英帝國喺十九世紀靠海軍擴張，佢哋用嘅時間就慢慢變成全世界嘅標準。

皇家天文台，座落於格林尼治公園個山頂。

英國海事博物館

正因為咁，格林尼治成為咗遊客去倫敦其中一個必睇嘅景點。格林尼治值得參觀嘅地方包括格林尼治天文台、英國海事博物館（National Maritime Museum）同埋Cutty Sark；天文台、海事博物館同埋子午線都喺格林尼治公園入面。

歷史

由格林尼治出土嘅文物，人類文明喺格林尼治最早嘅踪跡應該係羅馬帝國時代起落嘅一條路，條路由倫敦一路伸到多佛。1902年，考古學家喺條路嘅遺址掘三百個銅錢，考證過係克勞狄一世同埋霍諾留兩個皇帝之間嘅時代，亦即係公元一世紀到四世紀嘅事。最早住喺格林尼治嘅人應該係青銅時代嘅薩克森人，嗰陣大概係公元六世紀，有土丘做證。英國第四台嘅考古隊伍喺2000年同埋2003年掘過啲土丘，研究呢啲早期遺跡。

「格林尼治」呢個名大概係「青草村」咁解。後來，開始有人用「東格林尼治」(East Greenwich)呢個名，廢事同「西格林尼治」（West Greenwich），即係德普福（Deptford）搞亂。不過「東格林尼治」呢個名去到十九世紀又慢慢冇人用。而家，「東格林尼治」同「西格林尼治」一般係指英國海事博物館同埋舊皇家海軍學院以東同埋以西嘅地方。

皇家天文台正門

1082年，而家格林尼治公園一帶嘅地方正式收歸國有，並且起咗個行宮。個行宮喺1300年之前就起好咗，但係實際竣工日期就搵唔返。1447年，個行宮正式改建成格林尼治宮（Palace of Placentia，通稱Greenwich Palace）。有兩個英國君主喺格林尼治宮出世，佢哋係瑪麗一世同埋伊利沙伯一世。英國內戰（1642至1651年）之後，王宮丟空咗。不過冇耐之後，查理斯二世喺1675年決定喺格林尼治開始起皇家天文台。後來，喺1873年，王宮嘅樓宇重開，變成皇家海軍學院。

格林尼治一直係根德郡嘅一部分，直至1889年，倫敦自立成為一個郡，格林尼治亦撥入倫敦。

地理

地勢

由泰晤士河北岸望過去格林尼治。左邊嘅白色建築就係海軍學院。

格林尼治位於泰晤士河嘅河套嘅外圍，嗰個位河水好深，方便舶船。條河係格林尼治北面嘅邊界；由河邊開始，過咗市中心之後再向南行，高度就會一路上升，經過格林尼治公園去到布勒希斯(Blackheath)。格林尼治向西同劉易舍姆（Lewisham）接壤，向東就同貝克斯利（Bexley）接壤。

天氣

嗰度嘅天氣同倫敦其他地方大致一樣，天氣一年到晚都好潮濕，相對濕度大概係百分之九十。七月最熱，平均一日最高攝氏23.5度；二月最凍，平均一日最低2.1度。冬天間中會落雪，平均一年落十四日雪。

人文

格林尼治所在嘅格林尼治區，人口以白人為主，2011年人口普查時佔過半數。少數族裔當中以非洲黑人最多，另外仲有一啲加勒比海黑人同埋亞洲人。區內有兩間中學服務居民，分別係John Roan School（男女都收）同埋St Ursula's Convent School（淨係收女仔）。大專院校方面，格林尼治有格林尼治大學，校址就係以前皇家海軍學院嘅架步；倫敦三一音樂學院亦都喺格林尼治區內。

交通

Cutty Sark站入口

有兩條鐵路線服務格林尼治呢個地方，分別係英國東南鐵路（Southeastern）嘅格林尼治線，同埋碼頭區輕鐵（Docklands Light Railway，簡稱DLR）。格林尼治線向西可以搭去倫敦市中心嘅倫敦查令十字站（Charing Cross）或者倫敦炮筒街站（Cannon Street），向東可以搭去根德郡北部。碼頭區輕鐵係一條服務倫敦船塢區同埋格林尼治一帶嘅無人駕駛輕鐵，喺格林尼治嗰截由北向南。呢兩條線可以喺格林尼治站轉車。碼頭區輕鐵重分開設有Cutty Sark站，專服務參觀格林尼治市集、天文台同埋博物館嘅遊客。

水上交通方面，格林尼治有個碼頭，可以搭倫敦渡輪（London River Services）。另外，格林尼治有條行人隧道穿過泰晤士河個底，行去狗島（Isle of Dogs），亦即係金絲雀碼頭（Canary Wharf）一帶。條行人隧道係英國一號單車幹線嘅一部份，不過隧道入面唔畀踩車。

景點

格林尼治大概可以分成三部分，每一部分都有佢嘅景點。首先，泰晤士河岸邊有河景睇，重有出名嘅舊商船Cutty Sark。行入啲，格林尼治市中心嘅市集亦係遊客經常睇嘅景點。當然，最重要嘅自然係格林尼治公園，包括公園入面嘅格林尼治天文台同埋皇家海軍博物館。

河邊

Cutty Sark 2005年個樣

格林尼治嘅泰晤士河河邊有唔少景點，當中以舊商船Cutty Sark最出名。Cutty Sark係一隻木造大帆船，個名出自蘇格蘭嘅一款底衫剪裁。隻船又叫過Ferreira。隻船喺1869年至1922年之間用嚟運輸貨物，主要運茶同埋羊毛。1953年起，隻船永久舶喺格林尼治岸邊，改裝成博物館。2007年，Cutty Sark喺維修保育期間著火，燒爛咗隻船嘅大部分木結構，2012年4月重開。

河邊一帶仲有唔少出名嘅建築，包括舊皇家海軍學院（Old Royal Naval College）。舊海軍學院啲樓而家多數畀咗其他學院用，包括格林尼治大學（University of Greenwich）同埋三一音樂學院（Trinity College of Music）。Cutty Sark附近又有條格林尼治行人隧道（Greenwich foot tunnel），連接格林尼治同埋泰晤士河對面嘅Island Gardens。另外，千禧巨蛋（Millennium Dome）文化中心所位處嘅北格林尼治區都係格林尼治河岸嘅一部分。

市集

格林尼治市集

格林尼治市集一帶自14世紀已經有人做生意。不過，而家嘅市集要到1700年先至正式成立。1700年，格林尼治醫院（而家變成咗海軍學院建築群嘅一部分）嘅負責人得到皇帝御准，逢星期三、六開市集做生意，御准期限一千年。圍住個市集嘅幾棟樓喺1827至1833年起好，而家係二級法定古蹟。市集個簷篷就係1902至1908年起成嘅，後來1858至60年改建過，1980年代再改過。

近年，格林尼治市集一個禮拜有五日開門做生意，星期一、二休息。不過，市集附近好多舖頭都會做足七日生意。市集逢星期三專賣嘢食同埋家庭用品，星期四、五專賣古董同修藏品。市集嘅地主話，佢哋準備喺2013年重新規劃市集，將個市集活化再利用。

格林尼治公園

由格林尼治公園山頂望落山腳

由座落河邊嘅皇家海軍學院後面開始一路向南行上山，一路都係格林尼治公園嘅範圍。呢笪草地本來係一個獵原，十五世紀嘅時候起咗個格林尼治宮，之後亨利八世喺度放養咗一群鹿，用嚟畀佢打獵耍樂。十七世紀，公園撥咗出嚟做格林尼治皇宮嘅打獵森林。1675年，皇家天文台起咗喺已經荒廢咗嘅格林尼治宮嘅位置。

格林尼治公園係一個皇家公園，面積183公頃（大概0.7平方公里）。公園大致呈長方形，從地勢嚟講喺一個山坡上，分成山腳同埋山頂兩級。西北面嘅山腳挨住格林尼治市集，海軍學院同埋海事博物館都喺呢個範圍入面。從西北向東南有個好斜嘅山坡，山坡頂大約喺公園嘅正中心，亦即係皇家天文台嘅位置。坡頂嘅高地一直向東南伸延至布勒希斯。由於皇家天文台係東經零度嘅定義點，本初子午線自然就由南至北斬開格林尼治公園，所以園內有兩個有關子午線嘅景點，俾遊客留影。

格林尼治時間

格林尼治天文台屋頂有個時間球

格林尼治標準時間（Greenwich Mean Time，GMT）本來係指格林尼治天文台嘅太陽時間。而作為一個時區，格林尼治時間可以話係同世界協調時間同義，雖然世界協調時間其實係一個原子鐘時間，同格林尼治嘅太陽時間可以差最多0.9秒。

遠洋航行嘅水手一般都會隨船配備一個海事時鐘（marine chronometer），將時鐘上嘅時間同天上星宿嘅位置互相對照，就可以判定一個地方嘅經度。隨住英國成為世界航海大國，英國水手個鐘面嘅格林尼治時間就慢慢成為各地時鐘嘅參照時間。1847年，英國嘅火車公司決定統一用格林尼治標準時間寫時間表。1887年，國際子午線會議（International Meridian Conference）喺華盛頓特區召開，正式確立格林尼治做本初子午線嘅定義點。之後，世界各國陸續開始用「快過（或者慢過）格林尼治時間若干個鐘」嚟定義本地時間，例如香港時間快過格林尼治八個鐘。

1972年1月1日，世界協調時間正式取代格林尼治標準時間，成為世界報時標準。不過由於兩者相差唔會超過一秒，所以對於絕大部分用途實際上同義。故此，好多機構，尤其是同英國有關嘅組織，例如英國廣播公司國際頻道（BBC World Service），仍然用「格林尼治時間」嚟報時。

格林尼治天文台有個時間球（Time ball），1833年投入服務，每日下晝一點跌一跌，作為報時訊號。雖然1924年起，天文台亦有每個鐘透過無線電廣播報時訊號，但係時間球嘅運作至今風雨不改，成為一個懷舊景點。

知多啲

• 英國海事博物館
• 格林尼治天文台
• 格林尼治區議會