楊廣
楊廣（569年—618年4月11號），係隋朝第二位皇帝，604年到618年在位，死後廟號世祖，但後世以大唐李淵所畀謚號煬，而叫隋煬帝。
雖然佢將科舉制度發揚光大、開通隋唐大運河，但因為佢好大喜功、窮奢極欲、窮兵黷武，逼到人民作反，最後畀叛軍宇文化及派人做瓜。
生平
編輯楊廣係隋文帝楊堅第二仔，阿媽係獨孤伽羅。開皇元年（581年）封為晉王。[1]588年，隋朝派大軍進攻陳朝，由楊廣做掛名統帥。600年，文帝廢太子楊勇，改立楊廣做太子。
604年七月，文帝過身，楊廣繼位，就係隋煬帝。文帝臨死之前終於睇到楊廣份人嘅真面目，想立番楊勇做太子，畀楊素知道咗，就通知楊廣同阻止，冇耐文帝就死咗。楊廣又假借文帝名義落命令將楊勇賜死。[2][3]
煬帝派人召并州總管、漢王楊諒返長安，但係份文帝璽書同楊諒之前同文帝暗中約好嘅唔夾，楊諒知道有古怪，於是起兵作反，但係畀煬帝派兵平息咗。604年十一月，煬帝下令喺洛陽起東都，喺第二年每月用成二百萬人去起，由於啲官員督工又嚴又急，有成四五成工人死咗。煬帝又徵用幾十萬人喺洛陽嘅外圍地區掘塹，塹即係坑，由龍門（喺今日山西省河津市）向東掘到長平（喺今日山西省高平市）、汲郡（喺今日河南省衛輝市），再去到臨清關（喺河南省），過咗黃河又向西掘，掘到去上洛（喺今日陝西省商州區）。[2]
605年改用大業年號，同年起通濟渠，前後用成百幾萬人去起。煬帝又下令喺江南建造龍舟同其他船，加埋一共幾萬隻船。[2]
607年，煬帝處死光祿大夫賀若弼、禮部尚書宇文弼同太常卿高熲。同年拉咗百幾萬男丁起長城，過程之中死咗五六成工人。608年，徵調百幾萬人民起永濟渠。[1]
大業八年（612年），煬帝第一次東征高句麗，徵調過百萬士兵同大約兩百萬民伕，但係戰事唔多順利，於是撤軍。呢年發生旱災同瘟疫，死咗好多人，尤其係山東地區。[4]
613年，煬帝第二次東征高句麗，之後楊玄感響黎陽起兵作反，煬帝唯有撤軍。雖然楊玄感好快就失敗咗，但係各地啲人起兵自立一單接一單咁嚟。614年第三次東征高句麗，打到高句麗請降之後就撤軍。大業十一年（615年），煬帝去北方巡視嗰陣，畀突厥始畢可汗嘅大軍包圍，要等到突厥撤兵之後先甩到身。[4]
616年，煬帝走去江都，[4]之後冇再返番去東都（洛陽）。
617年，李淵響太原起兵，入到關中，擁立代王楊侑做皇帝，就係隋恭帝，名義上將煬帝升做太上皇，但個效力只限於李淵控制嘅地方。618年三月，將軍宇文化及響江都作反，殺咗煬帝[4]，史稱「江都兵變」。