江村話
江村話（粵拼：gong1 cyun1 waa2）係粵語方言，屬廣府粵語，分佈喺廣州北郊嘅江高鎮一帶嘅村落，係廣州北郊粵語方言嘅代表點之一，同蚌湖、神山、石井、太和、鐘落潭並列。
| 江村話 | |
|---|---|
| 發音 | kɔŋ55 t͡ʃʰyn55 wa35 |
| 用嘅國家、地區 | 中國 |
| 區域 | 廣州北郊江高鎮一帶 |
| 講嘅人口 | — |
| 構句法 | 主語-謂語-賓語（SVO） 形容詞-名詞，介詞前置 |
| 系屬 | |
| 文字 | 漢字 |
| 語言代碼 | |
| ISO 639-1 | 無 |
| ISO 639-3 | — |
因爲江村地區喺舊底係屬廣州府嘅番禺縣管，呢度嘅人習慣叫當地做上番禺，而廣州城、市橋地方做下番禺。因爲喺番禺縣北，所以又叫禺北話，呢個名係指舊底上番禺所有村鎮嘅話。
語音
編輯聲母
編輯江村話聲母格局基本同廣州一致，但來泥二母徹底混合，亦即唔分n、l，佢哋係同一聲母嘅隨意變體。
韻母
編輯江村話嘅韻母格局基本同廣州話一樣。但喺具體字韻上有啲出入。豪韻字喺廣州話高化成ou，但喺江村話繼續保留喺古音狀態，讀aau，比如「好」字，江村話讀haau2（特殊嘅係「冇」，讀maau5）。蒸韻字喺廣州話係ing，而喺江村話同ang合流，冇ing呢個韻母，比如蒸讀成zang1，城市讀成sang4 si6。
聲調
編輯江村話聲調格局同廣州話一樣，都係九聲六調，但具體調值唔一樣。當中陰聲調部分（1、2、3調）個調值同廣州話完全一樣，而陽聲調部分，陽平係22，陽去係21，喺聽感上、調值上，啱好同廣州話嘅陽平、陽去對調。喺聲調字音嘅分佈上，江村話濁上歸去嘅現象普遍過廣州話，有好多廣州話讀陽上嘅字，喺江村話讀陽去，而用廣州話聽會覺得佢哋似讀成陽平。比如下面三個江村話嘅人稱代詞，用廣州話聽，會覺得佢哋變成「崖、尼、渠」，但實際上喺江村話佢哋係陽去字，而喺廣州話係陽上字。
詞彙
編輯人稱代詞
編輯- 第一人稱：𠊎（ngaai6）
- 第二人稱：你（nei6）
- 第三人稱：佢（keoi6）
- 人稱複數形式：加「哋」（dei4，有變體lei1）後面，如𠊎哋、你哋、佢哋。
特別詞彙
編輯- 戀，lyun5，意思係玩，「你冇戀隻鷄個」（nei6 maau5 lyun5 zek3 gai1 o3），意思係「你冇去玩嗰隻雞」。
- 屋歸，uk3 gwai1，意思係屋企，江村話唔用廣州話「屋企」呢個詞，屋字發音係下陰入。屋歸有簡稱名，叫歸（gwai1）。比如返屋企，江村話叫「趄歸」（ce2 gwai1），歸唔係做動詞，而係做名詞，指屋企。
- 介陣時，gaai3 zan4 si1，即係「嗰陣時」，口語上個意味係「舊時、以前」。呢陣時，ni1 zan4 si1，口語意味係「而家，而今」。
- 「噉」會變音做gung2，江村人寫字時會寫做「拱」，佢個意思同廣州嘅「噉」一模一樣。
- 廣州話嘅「邊個」習慣講成「哪個」（laai6 gaai3），廣州話嘅「邊度」習慣講成「哪里、哪度、哪地」（laa6 lei1, laai6 dou4, laai6 dei4），「哪字」可讀laa6，亦可讀laai6。
- 「女仔」叫做「妹仔絲」（mui1 zai1 si1），「男仔」叫做「男仔頭」（naam4 zai1 tau4），女人叫做「婆乸」（po6 naa1），但呢個名相對來講偏貶義，冇噉好聽。
- 污糟邋遢，叫做「哪渣」（laa5 zaa2）、「泥世」（nai6 sai6）。
- 阿媽，喺舊時嘅江村話叫「阿大」（aa3 daai6），但而今好少人噉講，係個舊派用詞。
- 「仔」有個讀音叫doi1，呢個同台山話類似。
- 上邊叫「上高」（soeng6 gaau1），下邊叫「下低」（haa6 dai1）。
- 傻人叫做「孬仔」（naau3 zai1），傻更更叫「孬」（naau3），廣州腦科醫院係以前嘅廣州市精神病院，喺芳村、江村都有院區，當地人稱精神病院做「孬仔院」（naau3 zai1 jyun2）。
客家話嘅影響
編輯因爲江高鎮曾經貴爲廣州北郊嘅第一埠，係客家人從山區移民珠三角地區嘅中轉站，所以呢度嘅粵語受客家話影響，吸納咗一啲客家話嘅詞彙、發音，比如第一人稱叫「𠊎」唔叫「我」，同客家話一樣，又比如去「玩」，江村話叫去「撩」（liu6，有變體liaau5），亦係客家話借詞。喺發音上，一啲字詞亦係客家話借詞，比如廣州話講「嗰」，江村話講「介」，比如話「介隻嘢」（gaai3 zek3 je6），就係「嗰隻嘢」。「個」字亦受客家影響，變音做gaai3，如「介個人係咪江村㗎？」（gaai3 gaai3 jan4 hai4 mai4 gong1 cyun1 gaa3），但受廣州影響，亦有將「個」字讀返做go3，現時客家影響同廣州影響並存。
廣州話嘅影響
編輯因爲廣州話嘅強勢，一啲江村話嘅字調變到同廣州話趨同，現時處於保留本音同畀廣州話改音兩者之間。最典型係陽平、陽去呢兩個同廣州話音調唔一致嘅地方，畀廣州話影響咗。
參攷書
編輯- 陳衛强。《《廣州地區粵方言語音研究》》。暨南大學出版社。ISBN 9787566800404。