語系
語言嘅第一級系屬分類
語系（粵拼：jyu5 hai6；英文：language family）係對語言嘅第一級系屬分類，靠語言嘅發展演變同埋各種特質（語音、詞彙、語法等），將似嘅語言歸做同一語系。
語系可以向下細分成唔同語族同語支。
基本概念
編輯想像家陣有一個群體嘅人，佢哋喺語言上好均一，成個群體是但攞兩個人嚟睇，佢哋嘅母語都係互通嘅；而家佢哋因為戰亂等嘅原因，其中一部份嘅個體遷徙咗去第度，變咗做兩個群體；因為語言演變嘅關係，過咗幾個世紀之後兩者講嘅話變到好唔同，變到唔再互通，但兩隻話仲係會有好多相似嘅地方；如果有若干隻語言，佢哋係好似上述個例子噉由同一隻語言變出嚟嘅，佢哋就算係屬同一個語系[1]。
下圖係日耳曼語族（Germanic languages）嘅分類樹狀圖，圖入面包括咗英文（English）同德文（German）等。
.png)
語言特性
編輯
屬同一語系嘅語言往往會有好多相似之處。
喺詞庫上，屬同一語系嘅語言會有同源詞。假想某隻語言，有某隻詞語，後來隻語言嘅其中兩種方言慢慢各自演變，喺發音等各方面起變化，最後變成完全冇能力通話嘅兩隻語言，同時手上嗰隻詞語因為發音變化，而變咗兩隻語同樣、但意思一樣（或者好相近）嘅詞語，而呢兩隻詞可以追溯返去同一隻詞嗰度，所以就是為同源詞。舉例說明，英文同德文都係日耳曼語言，由原始日耳曼語演變而嚟嘅[2]，而兩隻語言指阿媽嘅詞語好相似：
－呢兩隻詞語，據估計都係嚟自原始日耳曼語指母親、阿媽嗰隻詞語。到咗廿世紀，英文同德文之間經已有巨大嘅差異，兩者無法通話，但係兩種語言同源，各自由原始日耳曼語嗰度繼承咗大量嘅詞語，英文同德文嘅同源詞喺發音、拼寫方法同詞義上都有相當嘅相似之處。