決戰葡京之巔

  提示：呢篇文講嘅唔係決戰紫禁之巔。

《決戰葡京之巔》係香港2000年嘅低成本動作電影，由勵啓傑（萬力）執導，林偉雄、楊證樺、李志聰主演。

決戰葡京之巔 The Young Violence
決戰葡京之巔嘅封面
資料明細
導演	勵啓傑（萬力）
監製	天下
編劇	勵啓傑（萬力）
主演	林偉雄、楊證樺、李志聰、周恩恩、賴錦基、B仔、Quienee、莫偉文
攝影	梁允邦
剪輯	賓尼
製片商	威威股份有限公司
片長	90分鐘
產地	香港
話	粵語
上畫同發行
上畫日期	2000年

導演梁仲文2023年喺網上以搞笑方式介紹呢部電影，令電影重新受到關注，之後更加連同游學修、楊證樺等翻拍做短片《真。決戰葡京之巔》。

劇情

由林偉雄飾演嘅過氣殺手因為爭Kawaii哥錢，所以Kawaii哥叫佢按黑社會大佬洪爺嘅指示，殺死九子連環肥龍。因為過氣殺手本身已經金盆洗手，佢朋友，楊證樺飾演嘅殺手（Music）勸佢唔好出手。

喺同Music食飯嘅時候，過氣殺手就講出「三劍俠」嘅事。平頭庄、骨精良同埋肥蟲係香港大滾友，而平頭庄曾經係洪爺嗰女，雯雯嘅男朋友。洪爺想利用骨精良，引誘肥蟲同平頭庄到澳門共嘗聲色犬馬，以拆散平頭庄同雯雯。喺澳門嘅期間，骨精良同埋賣牛肉乾嘅女店員發生一段浪漫關係。之後平頭庄同骨精良返到香港就被Kawaii哥請嘅過氣殺手殺死。

過氣殺手同殺手朋友去見Kawaii哥，之後俾殺手朋友偶然偷聽到Kawaii哥同肥龍嘅電話。之後過氣殺手同殺手朋友跟蹤肥龍，過氣殺手係同肥龍嘅對決中殺死咗佢，但呢個時候Kawaii哥出現，想殺死過氣殺手。原來Kawaii哥係想獨呑骨精良帶返嚟嘅白粉嘅利益，所以一路假藉洪爺落指令殺死三劍俠。但喺Kawaii哥開槍之際，俾Music阻止，並俾佢打低。

演員表

演員	角色	備註
林偉雄（而家叫林雲中）	過氣殺手（冇角色名）
楊證樺	Music	過氣殺手嘅朋友
莫偉文	洪爺（又名金爺）	黑社會社團大佬，喺美國啱啱返嚟
李志聰	Kawaii哥	洪爺個仔，毒品拆家
周恩恩	雯雯（Suki）	洪爺個女，Kawaii哥嘅妹妹
萬力	九指連環肥龍	原本同Kawaii哥合作，後被出賣，喺同過氣殺手嘅對決被殺死
賴錦基	骨精良	「三劍俠」最fit嗰個，俾Kawaii哥搵返嚟嘅殺手殺死
神秘人	平頭庄	「三劍俠」之一，曾經係雯雯男朋友，俾Kawaii哥搵返嚟嘅殺手殺死
B仔	肥蟲	「三劍俠」之一，俾Kawaii哥搵返嚟嘅殺手殺死
Quienee	大三巴賣牛肉乾女店員	一開始同三劍俠有口角，後與骨精良成為情侶

經典對白

過氣殺手：

「又係凍檸茶，嗌杯西多⋯ 嗌件西多得唔得先？哈哈⋯ 嗌杯西多⋯ 」

「嘩！ $27.8，兩杯凍檸茶咋喎⋯ 唉，飲埋先唔好蝕底。」

「邊有咁橋㗎，有咁啱得咁橋，我都中3T啦，我唔使做啦！」

「就係唔係唔係咁橋，所以就係⋯ 我覺得點都係有啲嘢喺度嘅。」

「但你知我做邊行，講feel你明唔明啊？」

「唔好即刻判斷所有任何嘢先。」

「殺還殺，唔好殺⋯ 唔好殺我，唔好射我個腦呀」

Music：

「你記唔記得你應承過我啲咩㗎，你應承過我唔做㗎。你跳返出嚟，你咁辛苦跳返出嚟，你而家又跳返入去。你對得住兄弟咩？吓！」

「對唔住⋯ 對唔住呀！！！」

「洪爺、Suki、平頭庄、平頭庄。」

「唓，邊有講feel 㗎，你真係，我唔知咩，我夠講feel啦，擺明就係啦，好明顯係㗎！你都識講講feel㗎嘛，第一擊就要擊中啦係咪啊？」

「你求其諗樣嘢問佢攞咗字跡先，跟住check吓係咪先啦，你起碼中咗少少先啦係咪啊，你買3T都中咗腳先啦！」

「攞字跡啦，攞字跡呀！」

「我以前識嗰個唔係你嚟㗎喎，咁樣嘅你。」

「That’s it! You know? You try! Com’on baby!」

雯雯：

「Cheap到死，請人哋嚟呢度食嘢，cheap精。」

洪爺：

「我姓何嘅，單名一個洪字，通常啲人都叫我做洪爺，你可以叫我做何伯都得㗎。」

（用力聞牆）「冇返嚟三年，都係保持住哩浸味。」

骨精良：

「嘩！感唔感受到嗰種滾友嘅氣息喺度，嗱話你知，經過今晚哩幾日我哋玩呢，你唔好話雯雯啦，一百個靚過雯雯嘅女都會出現喺你面前，包你忘記過去、展望將來、回歸都嚟緊。」

「我哋呢啲滾友宣言嚟㗎嘛，凡事要有道理，樣樣安排妥妥當當。」

「佛都假啊。」

「好去唔去，去搵何先生傾偈。咁你今日個樣滑過滑滑哦，輸哂食蛋撻啦你。講到明啦，呢餐我就冇㗎啦，買碗白果粥你食，好唔好先？」

「喺酒店附近行兩行，有條女走埋嚟，本身我就喺酒店嗰度搵佢嘅，跟住行吓行吓，佢抌住我喎，嘩咁我梗係老虎蟹chur住佢㗎啦。佢初初問我先生做唔做「平友」，咁我梗係小姐做什麼「平友」呢？佢話你去唔去？我話去死。跟住行多兩行佢就話咁你即係去定唔去？我就話幾多嚿水呀？佢話兩舊水。嗰吓嘢呀！嘩！最緊要佢個胸大，你有冇試過胸大嗰啲女呀？跟住兩舊水我咪拖住佢行囉，一路行我咪同佢講笑囉，我就話喂，啊廣東人想講水餃一碗幾多錢嘅國語點講？你估佢真係答我喎，（普通話）水餃一碗多少錢？水餃一碗多少錢？嘩，幾cheap啊即刻，咁我就同佢講，你多麼的cheap呢？咁快就同我睡覺？佢即刻笑到Gap Gap笑。一笑嗰下不得了呀，（抱胸狀，手臂上下移動）咚咚咚咚咚咚咚！喂真係話時話，尋晚搞到佢泵泵聲啊！好在何連俾咗幾間boom boom房我咋！」

「我都叫你返去酒店攞張紙、攞支筆寫信囉，買咩手信，佢係咪真係傻你帶佢去睇醫生啦。」

「金爺叫我哋過嚟係Wet，唔係過嚟係Greg，你唔好自己喺度亂咁Add OK？」

製作

呢部電影嘅製作非常粗疏，拍攝嘅時候係無劇本，只有幾句故事大綱，演員要自己即興發揮，所以有好多唔合理同不斷重複嘅對白；所有場景都係現場收音，唔單止有時候聽唔到角色嘅對白，甚至打電話嘅場景，係由電話對面嘅角色喺現場讀出嚟；另外，主角之一嘅林偉雄，佢嘅片酬只有$1000。

佚事

係劇中前往澳門嘅「三劍俠」：平頭庄、肥蟲、骨精良，個名出自香港漫畫牛佬系列嘅《豪情大滾友》。