香港漫畫
香港漫畫通常都叫做公仔書，而文化界興叫做港漫，1970到90年代係港漫嘅高峰，行出街好容易都會見到好多人插住本公仔書係褲袋。嗰陣時最賣得嘅港漫幾乎都係武俠漫畫，呢啲武俠漫畫以打打殺殺嘅風格見稱，全盛時期幾乎每日都有兩三本公仔書出版。不過1990年代後期，港漫嘅風格開始有啲改變，已經再唔單單係啲打打殺殺嘅武俠漫畫，嗰陣出現咗好多唔同類型嘅公仔書。雖然主流市場仍然以武俠或者係啲打打殺殺嘅公仔書為主，但係依家香港嘅漫畫出版社都願意出多好多唔同類型嘅漫畫。
香港漫畫簡史
編輯原來喺清末期間嗰陣香港已經有漫畫，因為當時嘅朝廷腐敗不堪，於是激起廣東南海人何劍士，用漫畫嚟表達對腐敗朝廷嘅不滿。佢嘅漫畫分別喺上海同香港多份報章刊物度發表。另一位香港漫畫先驅，係廣州畫家鄭磊泉，當時佢應香港梁國英藥局嘅邀請，嚟香港編繪《人鑒》畫冊。但當呢兩位漫畫家死咗之後，香港漫畫界就沉寂咗一段長時間。
直到1934年《工商日報》嘅《漫畫週刊》出現，香港漫畫又再蓬勃起嚟。1940年代初，有好多內地漫畫家因為抗日戰爭爆發，局勢動盪，所以嚟香港避難。好似廣州嘅李凡夫、林檎、潘醉生，上海嘅葉淺予、張正宇、丁聰……等等，都係當時首屈一指嘅大師。佢地嚟咗香港之後，喺呢度定居，又成立咗個「全國漫畫作家協會香港分會」。不過戰後至1950年代中期，好多漫畫家都返返中國，結果香港漫畫又再次沉寂返。
早期嘅香港漫畫，多數都係啲單格或者近似插圖咁樣，內容多數都係取材自現實生活，或者係諷刺時事，同今日嘅公仔書有好大分別。
而家嘅香港漫畫變革係喺1967年之後，受到外國漫畫好大影響，因為喺呢個時候香港無綫電視大量推出日本動畫片，好似《小飛俠》、《青春火花》、《超人》咁，令當時一直深受中國漫畫熏陶嘅年青漫畫家受到唔少衝擊同影響。黃玉郎、上官小寶、上官小強等人陸續跟風，畫咗好多新型嘅公仔書創作，慢慢佢哋發展出自己嘅風格，出版上開始有咗自己嘅模式，結果帶動同影響咗成個香港漫畫界同漫畫出版業。喺1960年代尾，老派漫畫好似許冠文嘅《財叔》、《神筆》、《神犬》，王澤嘅《老夫子》，宋三郎嘅《傻偵探》同司徒庸嘅《傻大姐》咁，雖然重有一定嘅市場，但到咗70年代，就再鬥唔過充滿電影感同分鏡頭式嘅武打技藝及社會寫實嘅公仔書咯。
小流氓
編輯1970至90年代，有一批年青漫畫家以新思維為香港漫畫市場殺出一條新血路，其中最突出嘅一個，都可算係《小流氓》作者黃玉郎。
受咗日本漫畫同埋歐美漫畫影響，嗰陣時嘅黃玉郎放棄咗港漫原本只係單格或近似插圖嘅形式，而以充滿電影感同分鏡頭式嘅風格去畫《小流氓》，故事亦好有突破，唔再係正正經經嘅故仔，而係有好多打打殺殺嘅場面，同埋有好多粗口，雖然喺社會上好多輿論指呢種風格過分渲染色情同暴力，但對於當時好多低下層嘅香港市民嚟講，《小流氓》嘅世界觀又的確可以產生到共嗚。
喺《小流氓》入面，正邪對立好明顯，人物性格強烈，再加上1970年代嘅香港社會本身存在好多壞風氣，好似貪污咁，而《小流氓》嘅主角對付壞蛋、教訓衰人嘅情節，的確係投射出好多低下層香港市民嘅心聲，最後發展到同日本黑幫羅刹教周旋後改名《龍虎門》。
土炮工業
編輯《小流氓》嘅成功令到好多漫畫家跟風，類似風格嘅公仔書大行其道，出公仔書變成一門賺錢嘅生意，跟日本漫畫家好似池上遼一漫畫風格嘅第二代漫畫家開始成熟。呢班漫畫家之中以外號「三劍俠」嘅馬榮成、馮志明、李志清最突出。「三劍俠」為咗追求更完美嘅構圖，參考咗好多歐美插畫家嘅作風，加上印刷技術嘅進步，出版彩色公仔書嘅成本下降，佢哋除咗追求構圖華麗，重追求色彩，但由於呢種制作太過花巧，以每星期一本嘅出版速度，需要好多人一齊畫先可以做到，於是發明咗一種流水作業嘅漫畫生產方式。
當時嘅香港工業發達，周圍都有好多工廠，而工廠嘅特點係以一種流水作業同埋好多家庭式生產產品，當時嘅漫畫家引入咗呢種觀念，發明咗一種工業化嘅漫畫製作流程。由於好多人都叫呢種流水作業嘅生產方式做「土炮」，所以當時亦有好多人將流水作業生產嘅漫畫稱之為「土炮漫畫」。
呢種「土炮漫畫」會由一個主編統籌，帶領一個制作組包括有負責起稿嘅主編自己，負責畫人物角色嘅主筆，另外重會有一大班助理，分別負責畫背景、風位、衫紋、頭髮。成個制作組夾埋通常會叫做「寫畫部」，而漫畫家亦慢慢開始叫做「寫畫佬」。不過黃玉郎就鍾意將佢寫畫部一班助理叫做「御林軍」。呢個時期亦係港漫嘅最高峰時期，代表作有：龍虎門、李小龍、中華英雄、玉郎漫畫、醉拳、如來神掌、怪異集、壽星仔、刀劍笑。
獨立創作
編輯到咗1990年代，香港漫畫界開始青黃不接，好多寫畫佬開始技窮，公仔書故事越嚟越無料到。加上新一代人開始成長，呢一批1990年代嘅後生仔多數受過高深教育，佢地好多都覺得公仔書嘅故事膚淺同無新意，加上電影同電視嘅競爭，資訊越嚟越發達，日本漫畫又再次興起，以及打機文化，都對港漫構成極大衝擊。
不過同一時間，香港出現咗一批浸過咸水返嚟嘅文化人，佢哋對畫漫畫亦好有興趣，例如歐陽應霽、榮念曾咁，佢哋出版咗好多風格同故事形式都同“土炮”好唔同嘅漫畫，呢啲風格又影響另一批獨立漫畫家，例如利志達、林祥焜、國志鳴咁，令港漫越嚟越百花齊放。
再加上電腦同網際網絡越嚟越興，所以越嚟越多民間獨立創作嘅漫畫喺網絡上出現。但係整體嘅香港漫畫市場，喺受到日本同美國漫畫競爭之下，已經無以前咁風光，再加上打機文化興起，今時今日已經唔再容易見到有人插住本公仔書喺褲袋。
漫畫報紙
編輯除咗公仔書，喺70到80年代初，重有漫畫報。
針對社會輿論對暴力漫畫嘅關注，令香港政府喺1975年10月通過「不良刊物法例」，其中特別針對「色情」同「暴力」嘅漫畫，喺呢條法例下，警察可以充公漫畫書，簡直就係想將公仔書趕盡殺絕。當時黃玉郎聯同另外兩大漫畫出版代表黃光、上官小寶，發起自律運動，停止出版色情書，同時減少暴力，但政府對公仔書嘅打壓令經營出版漫畫構成壓力，於是就諗出以報紙形式嚟出版漫畫。
結果，第一份漫畫報《生報》就咁喺1975年7月15號創報，接住嚟好似金報、青報、喜報相繼出版，好多漫畫都係先喺呢啲漫畫報連載，例如龍虎門漫畫，會先喺金報連載，然後再出公仔書。另外，馬榮成嘅中華英雄，最初亦係喺1980年開始喺金報連載，然後喺醉拳獨立本後半連載出版，後嚟大受歡迎先獨立出書。
上官家族
編輯喺黃玉郎嘅《小流氓》大熱同時，其實重有另外一個名稱一樣咁稱霸，就係以上官小寶為筆名嘅鄺東源，嗰陣時上官小寶以《李小龍》同《小流氓》打對台，兩本書同樣係當時暢銷漫畫之一，後嚟黃玉郎同上官小寶嘅出版亦成為香港出版最多漫畫嘅出版機構。而兩個人喺自己漫畫嘅專欄度筆戰，亦成為當時漫畫迷嘅話題。
喺嗰陣時，上官小寶嘅出版社出好多唔同嘅漫畫，因為咁而培訓咗好多漫畫家，而呢班跟上官小寶出身嘅漫畫家，幾乎全部都以「上官」做筆名，所以好多人都叫佢哋做「上官家族」。比較出名嘅上官家族成員有：上官小龍、上官小強、上官玉郎、上官小威等等。
不過，由於黃玉郎嘅出版社引入咗現代管理概念，漫畫王國日益坐大之餘，亦撬走咗好多上官小寶嘅人，佢哋雖然已經無幫上官小寶做嘢，但仍然用「上官」做筆名，因而形成「上官家族」喺當時香港漫畫界有一定程度影響力。
主流港漫格式
編輯今時今日港漫種類其實有好多，不過以主流可以喺報紙檔買到嘅公仔書嚟計，幾乎都有一個統一嘅格式。以前《小流氓》同而家嘅港漫好唔同，《小流氓》嗰陣啲公仔書都係打橫掀，印刷術語叫「橫度」，嗰陣嘅公仔書只係賣兩毫子一本。而依家嘅公仔書就全部都係直掀，印刷術語叫「直度」，賣成十三蚊一本。
而呢啲「土炮」港漫多數都係以週刊形式出，亦有雙週刊。而公仔書嘅內容，除左有主打故事之外，重會有主筆同助理嘅專欄。以天下畫集為例，佢主要頁數都係以風雲故事為主，但最尾嗰幾頁，一定會有「主筆信箱」解答讀者來信同作者週記，「助理專欄」係講寫畫部嘅趣事，呢啲專欄好多時都發揮左作者同讀者溝通嘅功用。
有時，公仔書會喺本書中間送拉頁海報，好似《玉郎漫畫》嘅拉頁海報就最受讀者歡迎。
種類
編輯港漫主要種類有：武俠（例如天下畫集、龍虎門、如來神掌，醉拳，中華英雄）、恐怖（例如怪異集）、綜合（例如玉郎漫畫、小強漫畫集）、超能力（例如黑豹列傳、海虎）、黑社會（例如古惑仔）。
參考
編輯- 閱讀香港普及文化 1970-2000 [修訂版] OXFORD UNIVERSITY PRESS ISBN 0-19-593753-8
- 香港漫畫 (by Wendy Siuyi Wong) Princeton Architectural Press ISBN 1-56898-269-0
- 上官小寶正傳 上官小寶著 博益出版社
- 連環圖大風暴 劉定堅著
- 連環圖大醜聞 劉定堅著
- 《漫畫讀物》雜誌 次文化堂出版
- 資本漫畫論 黎巴嫩著