油麻地戲院
22°18′45″N 114°10′09″E / 22.31250°N 114.16917°E
油麻地戲院（粵拼：jau4 maa4 dei6*2 hei3 jyun2，英文：Yau Ma Tei Theatre）係香港市區唯一仍然存在嘅戰前戲院建築，位於香港九龍油麻地窩打老道6號，曾經係附近居民同碼頭工人嘅消閑好去處。喺1998年結束營業後，戲院同年列為二級歷史建築。2012年，油麻地戲院活化成為演藝場地，特別係為粵劇新秀同新進劇團提供演出、排練同培訓設施嘅場所。
歷史
編輯油麻地戲院喺1930年落成，係市區僅存嘅戰前戲院。建築物具有嘅特徵元素包括正門入口兩邊門柱、中式鈄屋頂同埋具有裝飾藝術主義嘅正立面同山牆、支撐屋頂嘅鋼桁架同木檁條，同埋原有舞台嘅拱門同側牆。
1960年代係油麻地戲院嘅黃金時期，專門放映「邵氏」製作嘅電影，經常滿座，最後喺1980年加入「金公主院線」放映「新藝城」嘅電影。隨住時代變遷，日漸老舊嘅油麻地戲院未能夠同新式迷你電影院競爭，唯有進行大型翻新工程，全面提升銀幕、燈光、大堂、售票處等設施，但係生意仍然日漸式微。到咗1985年，「金公主院線」減產，油麻地戲曾為咗增加營業額，加入「日活院綫」（之後叫「巨人院線」）改為專門播放歐美同日本嘅鹹片，更首創一張戲飛可以全日任睇戲嘅「連環場」。油麻地戲院最後喺1998年7月31嘅正式結束營業，地政總署接收業權；同年12月，油麻地戲院獲得古物諮詢委員會評定為二級歷史建築物。
2007年香港政府決定將油麻地戲院活化，成為粵劇表演場地。油麻地戲院喺2012年空置多年之後重開，活化後嘅戲院有300個座位、兩個活動室，專為戲曲演出同相關活動，特別係為粵劇新秀同新晉劇團，提供演出場地。
支持粵劇發展
編輯為咗保存、推廣同推動粵劇發展，政府喺2009年將油麻地戲院同紅磚屋兩幢已經評級嘅歷史建築改建成為一間專為戲曲演出同相關活動，特別係粵劇新秀同新進劇團提供演出、排練同培訓設施嘅全港性演藝場地，喺2012年7月17日正式啓用，為市民提供服務。油麻地戲院並引入署方現行嘅「場地伙伴計劃」，畀業界參與將呢個場地發展成培育粵劇接班人嘅搖籃。
劇院設施
編輯| 座位數目： | 300個（包括4個適合坐輪椅嘅位） |
| 舞台面積： | 10米（闊）x 8.4米（深） |
| 樂池面積： | 22平方米 |
| 設施： | 電腦控制舞台燈光系統、先進嘅音響系統、電動吊杆系統同中英文字幕系統 |
| 用途： | 適合各類戲曲演出同相關嘅活動 |