手提電話
(由流動電訊跳轉過嚟)
手提電話（粵拼：sau2 tai4 din6 waa2），又嗌流動電話（粵拼：lau4 dung6 din6 waa2，英文Mobile phone），簡稱手提、手電或者手機，係可以周圍都講到嘅電話，唔使侷住喺一笪地方用。除咗好似傳統電話噉可以用嚟傾偈之外，新一代手提電話可以用嚟打短訊、收發電郵，甚至可以上互聯網，影相錄片同埋打機。
新式可摺疊式智能電話，三星Galaxy Z系列
手提電話係一推收發站嚟維持通訊，站連住公共電話網絡，噉樣，呢推站就組成咗手提電話網絡。站同站之間訊號係會疊埋一齊，費事通訊中斷。早排會嗌手提電話網絡做蜂竇，因為網絡覆蓋就好似蜜蜂竇裏面嘅格噉，一個黐住一個。六角型分佈可以起最少嘅站，最大覆蓋率。英文蜜蜂竇一格格嗌Cell，所以英文又嗌做Cellular phone。
有一啲電話都好似手提電話周圍傾，不過就唔係用手提電話網絡。衛星電話就係一例，係直接同天上面嘅人造衛星轉駁。呢類一般都唔當係手提電話。
早排嘅手提電話都幾大部，大細同水壺差唔多，仲有人整電話型嘅水壺賣，所以啲人就嗌佢做水壺，因為嗰時淨係有啲錢嘅人先會用，所以就係身份象徵，啲人就嗌佢做大哥大。
另一講法係，香港電視節目星星同學會有集搵咗洪金寶做嘉賓，話大家嗌成龍做「大哥」，洪金寶輩份重高過佢，所以大家嗌佢做「大哥大」；而佢又自稱係香港第一個擁有手提電話嘅人，所以手提電話就因為佢而有「大哥大」呢個名[未記出處或冇根據]。
仲有一講法係，手提電話仲未有正式名嗰陣，香港人習慣嗌「室內無線電話」做「無線電話」，同時亦有部份人嗌手提電話做「無線電話」。冇幾耐，有套嗌《英雄本色》嘅港產片，片中有個嗌「大哥大」嘅角色成日揸住呢款手提電話，所以啲人就嗌手提電話做「大哥大電話」喇。