深水埗公立醫局

深水埗公立醫局係香港一座醫療嘅建築，喺九龍深水埗醫局街137號，喺1930年代起，而家改咗做美沙酮診所。喺2009年12月18號被評為二級歷史建築。

史

深水埗公立醫局喺1911年設立，原本喺深水埗天后廟裏面，後嚟開闢醫局街亦因此而得名。1930年，醫局搬去現址嘅建築，並荷蒙當時嘅富商黃耀東出錢起，起好之後取代咗區內一間舊診所。深水埗公立醫局戰前係由深水埗街坊福利會負責打理，日間係醫療中心，夜晚就用作街坊福利會嘅議事地方。

1950年代初，唔少新移民定居深水埗，當時肺癆流行，醫局救治咗唔少病人。1950年代至1970年代，醫局晚間用作深水埗街坊福利會社區中心之用。2002年進行翻新工程之後，而家醫局已改做美沙酮診所，並改名叫「深水埗美沙酮診所」，由醫療輔助隊打理。

深水埗公立醫局係一楝樓高兩層嘅白色建築，上面寫住「深水埔公立醫局」，「深水埔」係「深水埗」嘅舊名，係現代裝飾派藝術嘅建築風格。醫局佔地超過1,000平方米，上層係員工休息室，下層係詢問處、診療室、注射室同辦公室。