清樂鄧公祠
22°26′48″N 114°03′38″E / 22.44667°N 114.06056°E
清樂鄧公祠，又叫思成堂，喺香港新界元朗錦田水尾村裏面，係當地鄧氏四大祠堂之一，用嚟紀念錦田鄧氏第十七世祖鄧清樂（名廣舍），估計大概喺明朝中前期（1490年左右）起，喺1985年被評為香港一級歷史建築，2010年5月17號確定評級。
建築 編輯
清樂鄧公祠採用三進三間式嘅設計，係錦田鄧氏眾多祠堂之中最具規模而且面積最大嘅一間。前台起咗支柱，上面承桁樑，斗拱同橫樑上面都有精細嘅雕刻。正屋脊上除咗有一雙鰲魚擺設之外，脊上正中有青龍浮雕、左右亦有瑞獸一對。正脊同垂脊之間有一對蝙蝠，垂脊盡頭就擺放咗瑞獸朝天吼，畀人一種莊重嘅感覺。此外，祠堂裏面嘅石柱同花崗石柱礎都畧有不同，提升咗整座建築嘅多樣性。上承橫樑木柱，而大門戶裏面有一屏風，只有達官顯貴嚟到先會開啟。裏面有康熙賜嘅「旨嘗換花翎」同「欽點花翎等衛」等功名牌匾，用以展示族人喺科舉考核中嘅成就，屋頂上面有多幅色彩豐富嘅壁畫，如「八仙圖」等。
乾隆五十九年（1794年）重修一次，喺1981年同鎮銳鋗鄧公祠再一同進行修葺工程。呢次修葺雖有專家協助，提升質量較高，但劃喺正門嘅一對門神就被油去並劃上較差嘅新貌，有論者認為係一種難以彌補嘅損失[1]。
門外大門之前有一對聯，係「南陽世澤 稅院家聲」，用嚟紀念鄧氏族人源出自商朝時嘅南陽（而家河南一帶），同埋鄧氏後人被封為稅院郡馬嘅一段歷史。
中廳裏面掛嘅「思成堂」匾額，常被指係1794年重修時，由乾隆庚子科（乾隆四十五年，1780年）進士初彭齡所寫，但喺完成「思成」二字後卻突然死咗，「堂」字就由其他人代造，造成匾上嘅文字字勢同風格唔同。但係此話似係誤傳，因初彭齡實際上喺1825年死，唔可能出現上述嘅情況。
添燈儀式 編輯
每年出世嘅男丁個名會登記喺「丁口冊」上面，之後先正式登入族譜。每年元宵節鄧族族人會喺清樂鄧公祠進行祠祭儀式，並替上一年出生嘅男丁「點燈」。
參考 編輯
- 《新界宗族文化之旅》，嚴瑞源編著，萬里機構，ISBN 962-14-2936-6
註 編輯
- ↑ 〈白德著，招紹瓚譯，《香港文物誌》，1991年，香港市政局〉