維基百科

港孩

港孩係指個性依賴、自理能力低，同抗逆力低嘅香港細路。

港孩係指喺20世紀90年代中後期至21世紀初，物質富裕、少子化社會下嘅產物。佢哋自細受到屋企人溺愛同外籍家庭傭工全天候照顧，習慣接受小王子、小公主一樣嘅呵護同伺候，造成自理能力、情緒智商同抗逆力三樣都低嘅「三低」港孩。當中，更有小六學生唔識綁鞋帶、剪指甲同洗頭沖涼等，缺乏基本生活起居能力，連買麵包都唔識，便溺亦唔識處理[1]。情緒智商低同抗逆力低嘅細路大咗之後較容易罹患情緒病，遇到挫折時自尋短見嘅案例亦屢見不鮮[2]。

有記者喺九龍塘一間小學做訪問，發現接近八成受訪學生唔識綁鞋帶、剪指甲同自行食有骨食物；亦有只係8歲嘅細路女擁有手提電話、數碼相機、MacBook同iPad等，身上服飾亦全部係名牌，對金錢毫無概念，曾經用多張1000蚊紙幣寫字畫畫，玩完就掉[3]。Janet Ma馬詩慧（受訪家長）用「6個不得」嚟形容港孩，就係「餓不得、飽不得、熱不得、凍不得、累不得、不舒服不得」[4]。

港孩特徵

編輯

大部份港孩都會出現以下幾個特徵[5]：

  1. 無自理能力，鍾意依賴其他人。
  2. EQ較低，為人情緒化。
  3. 無能力解決問題，鍾意講唔知道。
  4. 對大部份事情無反應，對任何東西唔感興趣。
  5. 唔珍惜學習，唔肯吃苦，對自己亳無要求。
  6. 好鍾意玩，但係唔知意義何在。
  7. 渴望被注意，但係又無面對群眾嘅信心。
  8. 追求物質生活，唔珍惜自己所有，妒忌其他小朋友擁有好玩具、好成績等。
  9. 寧願「悶」，亦唔願意「辛苦」。
  10. 唔食人間煙火，未經歷過任何欺凌同痛苦。
  11. 自我中心，要所有人都剩係關心佢一個。
  12. 自細因爲被父母過份呵護導致同父母實際諗得到嘅結果相反－寵壞，永遠有家長傍身保護。
  13. 事事要贏，輸打贏要。

港孩成因

編輯

學校價值教育減少

編輯

有學者覺得，港孩出現嘅成因源自家長對學校干涉同教師工作壓力連年增加、以及課程嘅倫理成份減少，令未有基本價值觀同德行嘅細路突然擁有近似成人嘅權力所致[6]。

家長過份保護

編輯
 
以「直升機家長」為題嘅漫畫

教育心理學家指出父母望子成龍嘅心態，過份注重仔女學業係導致港孩嘅成因。為咗畀仔女有更多時間溫書，完全唔畀佢哋做日常自理工作，導致仔女過份依賴，失去照顧自己能力，成為「高分低能」嘅港孩。有啲細路自細由家庭工人打點一切，長大後唔可以獨立，就連高中學生參加學校夏令營時亦唔肯自己裝飯，要老師代勞[7]。除咗為仔女化解社會上遇到嘅問題，父母過度保護獨生仔女，令佢哋缺乏面對逆境能力。「直升機家長」（helicopter parents）一詞係形容一啲長期喺仔女頭上盤旋監察，時刻保護同指揮佢哋一舉一動嘅父母[8][9]。

家長投訴文化盛行

編輯

亦有一啲父母，當仔女遇到任何困難，即時挺身而出，為仔女向各方投訴，日本叫呢類自我中心嘅難纏父母為「怪獸家長」。2010年12月，歐洲一場暴風雪癱瘓咗倫敦希斯路機場，導致準備返香港過寒假嘅留學生滯留機場，部份家長聲淚俱下，甚至要求政府派三架專機將留學生接返香港。呢啲「港父母」同「港孩」受到輿論不斷質疑同批評[10][11]。

除咗投訴社會機構之外，部份疼愛仔女嘅家長以錯誤方法，例如要求個別照顧、將應有懲罰視作歧視等挑戰老師同校方嘅專業判斷，不斷投訴，令問題細路更加趨自我中心[12]。

課外活動過多

編輯

有研究認為港孩嘅成因同參加過多課外活動有關。呢項研究喺2011年對1912名小學4年級至小學6年級學生進行調查，發現超過4成半兒童參與4至6項課外活動，更有22%小學生參加課外活動達7項以上。因為父母花喺仔女活動開支每月可以去到1萬港元，所以，呢啲細路叫做「萬花童」。由於課外活動繁多，私人時間相對減少，有超過半數細路每日嘅私人時間只有1至2個鐘。除缺乏私人時間之外，「萬花童」嘅特徵仲包括溝通能力差、同相同年齡朋友甚少相處溝通、欠缺自理能力以及同父母關係疏離[13]。

個人化課程增加

編輯

有論者認為，課程改革後唔少科目以個人化考核，取代以往嘅統一標準，亦係港孩日趨自我中心嘅成因之一[12]。

家長未能以身作則

編輯

香港家庭教育學院喺2012年訪問近300名家長同300多名初中同小學生，歸納香港細路十大無禮行為。排第一位係細路對外傭或者長輩甚少講「唔該」，佔82%；第二係衝入車廂「霸位」。調查同時發現，74%嘅家長亦好少講「唔該」，90%家長表示會排隊「打尖」，所以，研究推論仔女無禮貌嘅主要原因，乃家長未有以身作則[14]。

解決港孩問題

編輯

有教育學者認為若果「港孩」情況延續，大個之後有可能對香港社會競爭力造成負面影響[3]。臨牀心理學家指出解決港孩問題，父母應採取「積極不干預」策略，放手畀仔女嘗試自主學習。家長同學校可以由日常生活做起，鼓勵仔女學習自立，當小朋友開始學識講嘢就要教導基本禮貌，小朋友4至5歲時應該學識自己梳洗等[15]。家長喺仔女參加活動時應互相討論，考慮仔女性情、興趣同能力，否則會令仔女感到被強迫參加，漸漸養成放棄同退縮嘅個性[8]。

香港有中學擔心「直升機家長」會削弱學生嘅抗逆力，禁止父母為仔女解決問題，例如禁止父母為仔女「補鑊」，將漏帶嘅嘢帶去學校。另外，亦禁絕家長陪仔女喺學校入面食飯[16]。

亦有小學校長指出港孩係由缺乏耐性嘅父母所造成，只要仔女一聲「唔識」，父母就立即為佢哋將事情處理妥當。其實，家長與其花費時間同金錢安排仔女參加大量課外活動，倒不如培養佢哋自理能力同增加佢哋對生活上嘅認知，包括經常遇到或者要完成嘅嘢嘅經驗，令佢哋喺生活經驗變得更加豐富同充實以及尊重他人嘅道理[17]。

睇埋

編輯

參考

編輯
  1. ↑ 〈王子公主變三低港孩〉。《東方日報》。2010-07-20。喺2011-01-31搵到。
  2. ↑ 〈「抗逆力」差 港孩易尋死〉。《多倫多星島日報》。2011-01-26。原著喺2013-11-09歸檔。喺2011-01-31搵到。
  3. ↑ 3.0 3.1 〈唔識綁鞋帶 港孩堪憂〉。《東方日報》。2010-05-23。喺2011-01-31搵到。
  4. ↑ 〈全球化新勢力　誰是直升機父母？〉。《蘋果日報》。2010-09-03。原著喺2021-04-26歸檔。喺2011-01-31搵到。
  5. ↑ 「港孩」10大特徵
  6. ↑ 梁亦華(2011.7.15)︰教育界的「蝴蝶效應」 互聯網檔案館嘅歸檔，歸檔日期2021年4月26號，.，《蘋果日報》，E06。
  7. ↑ 〈中四生去camp不肯自己裝飯，家長:「去camp無工人，叫校工啦」〉 (香港中文)。港生活。
  8. ↑ 8.0 8.1 〈「直升機父母」溺愛14歲女唔識飲水〉。《太陽報》。2010-08-16。喺2011-01-31搵到。
  9. ↑ 〈「直升機父母」特徵〉。《東方日報》。2010-08-16。喺2011-01-31搵到。
  10. ↑ 〈家長們，讓孩子成長吧！〉。《信報》。2011-01-07。原著喺2021-04-26歸檔。喺2011-01-31搵到。
  11. ↑ 〈13歲女：難得機會獨立處事〉。《蘋果日報》。2010-12-23。原著喺2011-01-26歸檔。喺2011-01-31搵到。
  12. ↑ 12.0 12.1 〈父母投訴文化 孩子自戀根源〉。《香港經濟日報》。2013-05-08。喺2013-05-08搵到。{{cite news}}: CS1 maint: url-status (link)
  13. ↑ 〈課外活動多 港產萬花童〉。《東方日報》。2011-04-11。喺2011-04-11搵到。
  14. ↑ 〈子女無禮貌 家長「身教」造成〉。《星島日報》。2012-04-05。喺2012-04-18搵到。
  15. ↑ 〈「港孩」三低 小六生不懂洗頭〉。《星島日報》。2010-07-20。原著喺2012-07-23歸檔。喺2011-01-31搵到。
  16. ↑ 〈港童大改造 中學禁家長「陪食」〉。《經濟日報》。2011-12-07。原著喺2012-01-18歸檔。喺2011-12-08搵到。
  17. ↑ 〈喇沙小學校長語家長：谷十項全能不如教自理〉。《明報》。2012-05-28。原著喺2012-07-09歸檔。喺2012-05-28搵到。

其他資料

編輯

出面網頁

編輯
由「https://zh-yue.wikipedia.org/w/index.php?title=港孩&oldid=2058454」收