源·區
源‧區（粵拼：jyun4 keoi1，英文：T‧PARK）位於屯門曾咀稔灣路25號，係香港第一個自給自足嘅污泥處理設施，由環境保護署管理，結合多項先進科技同埋唔同類型嘅設施於一身，包括每日可以處理高達2000公噸污泥嘅焚化爐、發電系統、海水化淡廠，同埋亦有開放畀公眾參觀嘅教育同自然生態設施，裏面更設有香港唯一嘅公眾SPA水療池，利用燃燒污泥產生嘅熱力將水加熱。
T‧PARK「源．區」嘅「T」字代表「轉煥」，有「轉廢為能，煥然一新」嘅意思，標誌住香港致力落實「轉廢為能」策略嘅決心[1]。
設計
編輯源·區選址偏遠位於屯門稔灣，目的係對周邊環境影響減至最低，來往源·區可以利用海路同陸路運輸。
污泥運送
編輯源·區接收香港11間主要污水處理廠嘅污泥，其中大概七成污泥由昂船洲污水處理廠經由海路運送。呢啲污泥存放喺密封貨櫃裏面，由拖船運去鄰近嘅新界西堆填區碼頭，再以貨車運到源·區處理，大大減低陸路運輸嘅負荷同對環境造成嘅影響。
自給自足
編輯源.區唔需要外界提供水同電。
- 熱能
焚化過程產生嘅熱能可以回收，畀設施嘅三個水療池同冷暖空調系統使用。
- 電力
透過焚化爐、渦輪機同冷凝器嘅互相配合，將熱能轉化為電力，供應整個設施嘅日常運作所需。
- 全面水資源管理
廠房特設海水化淡廠提供飲用水同設施用水。另外，污水經處理後會循環再用，用嚟灌溉、沖厠所同清潔用途。
社區
編輯源·區嘅兩座渦輪機全面運作嘅時候，可以產生剩餘高達兩兆瓦嘅電力輸出公共電網，足夠為4,000家庭供電，剩餘電力會輸出到公共電網。
建築設計
編輯源·區由法國建築師 CLAUDE VASCONI 設計，流線同波浪型嘅設計概念源自四圍嘅山巒海岸。善用日光、自然通風同天台綠化，有效發揮節能作用。
園林
編輯廣闊嘅園景區配以各種香港植物品種同一個雀鳥棲息濕地園。
環保物料
編輯- 節能玻璃
設施外牆主要採用具高熱效嘅玻璃，令到室內更加温暖明亮。
- 環保塑木 / 再造木
設施採用易於保養同含回收物料製造嘅環保塑木代替天然木。接待處亦選用唔需要砍伐林木嘅再造木。
- 石屎磚塊 / 環保嵌板
設施嘅車道鋪設含有再造物料嘅環保石屎磚塊。接待處嘅牆身選用再造塑料製成嘅環保隔音牆板。
- 防撞木
回收舊灣仔碼頭嘅防撞木，用來製造設施裏面園藝工程同傢具。
- 粉煤灰
由設施原址掘挖出嘅粉煤灰會循環再用，成為園藝工程嘅填料。
- 重用物料
源·區回收來自其他香港工程嘅建築物料，作為設施嘅填土材料。
污泥處理流程
編輯污泥用來做燃料，焚化過程所產生嘅熱能會被回收同轉化為電力。
污泥接收
編輯貨車進入污泥卸置區將污泥倒入儲存缸之前，會經過磅橋進行秤重同記錄接收嘅污泥重量。密封嘅污泥卸置區設有先進嘅除臭系統，以避免對外傳出臭味。貨車車身必需經過清洗同吹乾先可離開卸置區。自動化大型泥夾將污泥傾倒到指定斗槽，經混合後再泵入焚化爐。
焚化
編輯採用廣泛應用同高科技嘅流化床焚化技術，以高温燃燒嘅方式處理污泥。焚化爐裏面嘅燃燒氣體至少會有兩秒高達攝氏850度以上，以控制有機污染物嘅形成。呢個處理過程將棄置喺堆填區嘅污泥體積大減九成，同時亦減低咗溫室氣體嘅排放。
煙道廢氣淨化處理
編輯採用高效嘅煙道廢氣淨化系統，去除煙道廢氣中嘅懸浮粒子同污染物。利用一系列嘅處理器，包括多管式旋風分離器、乾式反應器同袋濾式集塵器，分別將較大嘅懸浮粒子同微粒去除，並中和同清除酸性氣體、有機污染物同重金屬。透過持續排放監測系統去監察淨化後嘅煙道氣體，確保符合嚴格嘅國際排放標準。
發電
編輯焚化爐就好似一個被大量水管包圍嘅鍋爐。焚化過程產生嘅熱能會將水煮熱，再轉化為蒸汽傳送到渦輪機產生電力。蒸汽喺冷凝器度凝結成水，然後回流到焚化爐再重複整個發電過程。
灰燼同殘餘物處理
編輯在焚化污泥同煙道廢氣處理過程後收集所得嘅惰性灰燼同殘餘物，會暫存喺儲存倉。灰燼同殘餘物嘅成分先會經過測試，確保完全符合特定嘅處理標準，先至運去新界西堆填區棄置。同最初被送到設施嗰時相比，處理後嘅污泥體積大減九成，有助減輕堆填區嘅負荷。
全面水資源管理
編輯利用先進嘅海水化淡設施潔淨由附近后海灣抽取嘅海水，處理後提供需要嘅飲用水同設施用水。另外，亦會收集雨水用來做非飲用用途。污泥處理設施更採用設計周密嘅污水處理系統，直接喺廠裏面收集同處理所有污水，循環用來做灌溉、沖廁所同清潔，以達至「零污水排放」。
景點
編輯- 源·林（T·GARDEN）
超過9,800平方米嘅戶外園林花園包括五大元素 — 噴泉花園、悠閒花園、禪園、濕地花園同戶外足浴池。
- 源·館（T·HALL）
訪客可喺呢個展覽廳透過一系列嘅創新同互動展品，認識污泥處理嘅過程。
- 源·湖（T·HABITAT）
重建嘅雀鳥保護區，樹木林立，係唔少自然野生生物嘅棲息地，包括小鸊鷉、翠鳥、苦惡鳥、蜻蜓同一啲兩棲動物。
- 源·泉（T·SPA）
焚化過程產生嘅熱能可以為設施內嘅水療池水加熱。置身喺熱水、暖水同凍水嘅水療池入面，可以眺望后海灣一望無際嘅海景，係舒緩同放鬆身心嘅最佳地方。
- 源·景（T·SKY）
位於行政大樓頂層，四周景致一覽無遺，更有一系列具環保意念嘅傢具同升級回收嘅陳列品以供參觀。
- 源·廊（T·GALLERY）
透過大型玻璃窗，訪客可以喺唔影響廠房嘅運作之下，睇到設施嘅營運情況。訪客亦會睇到一系列同實物一樣大細嘅模型而感受到設施嘅規模同複雜性。
- 源·臺（T·ROOF）
位於環境教育中心嘅天台，訪客身處呢個恬靜嘅戶外環境，可以鳥瞰后海灣嘅美麗景色。
- 源·茶（T·CAFE）
呢間自助茶館提供簡單輕食，並引入環保檯凳同餐具，為源·區增添貼心同意義。
- 源·廳（T·THEATRE）
配備先進嘅燈光影音系統，播放介紹源·區嘅短片。
- 源·點（T·CORNER）
舒適嘅等候同休息區，備有互動展品介紹環保資訊同播放自然生態短片。
開放時間
編輯星期一、星期三至日 上晝10點至下晝7點 （星期二休息）
