劉盈

 漢惠帝劉盈（粵拼：hon3 wai6 dai3 lau4 jing4） （前211年—前188年9月26號）係漢朝第二代皇帝，劉邦同呂雉個仔，前195年至前188年在位。

劉盈喺佢短暫嘅在位期間，以溫柔敦厚個性為人所知，佢積極推行黃老學說，注重國家休養生息同埋無為而治，放鬆文化專制政策，修築長安城，為鞏固西漢政權，安定社會，促進經濟文化嘅發展，作出咗一定貢獻。之但係，劉盈做皇帝嗰陣時，朝政深受佢阿媽呂后呂雉干預。呂后喺劉盈在位期間具有壓制性影響力，形成「兩主」相抗局面，亦可能因為咁，司馬遷所寫嘅《史記》未設孝惠本紀而設《呂太后本紀》。