漢語聖經協會

漢語聖經協會（英文：Chinese Bible International Limited）係一個《聖經》印刷機構，協會為唔同背景、年齡、知識水平嘅群體，出版合適嘅《聖經》、教材、研經工具、釋經參考書籍等。除咗書之外，亦會以唔同方式，例如電子聖經應用程式、光碟等現代生活常用嘅媒介，幫助人喺聖經裏面認識真理。

歷史

「漢語聖經協會」前身係「當代聖經出版社」，喺1987年11月成立，目標係將聖經翻譯成淺白易明嘅當代文體，幫助普羅大眾都能夠明白其中嘅真理。1992年，當代聖經出版社總會同國際聖經協會合併成為一個獨立嘅新機構，亦改名做國際聖經協會，目標仍然係支援堂會，用聖經作傳福音同栽培信徒嘅事工。2003年成為普世華人教會所屬嘅聖經機構：「漢語聖經協會」。新名稱反映咗一啲新嘅實質，但係亦冇忽略原有根基同定位：專注服侍全球華人社群同華人教會，支援堂會成長，建構聖經文化。為將服侍延展到世界各地華人群體，加拿大漢語聖經協會、美國漢語聖經協會同台灣嘅國際漢語聖經出版社相繼成立。為嘅係要完成上帝交託嘅使命：「聖經傳萬家，救恩臨天下」。

事工簡介

漢語聖經協會係一個致力推動華人聖經事工嘅機構，並將聖經出版同宣教理念結合，透過向全球中文讀者提供唔同媒介同類型嘅聖經讀本同研經材料，畀信徒同非信徒喺聖經之中認識神，生命得到改變。從四方面進發，達成幾項目標：聖經翻譯、聖經培育、聖言中心、聖經外展事工。

聖經翻譯

為咗滿足教會研經、牧養、讀經、福音事工嘅需要，漢語聖經協會分別進行咗《聖經新漢語譯本》同《聖經新普及譯本》嘅譯經計劃。

聖經‧新漢語譯本

聖經原文係用希伯來文、亞蘭文同希臘文寫成。隨住語言嘅轉變、聖經考古學嘅新發現同聖經研究新方向等因素，點樣將聖經內容用現代漢語準確無誤噉重新翻譯出嚟，呈現原文面貌，令人對神話語有更深認識，已經成為逼切嘅需要。所以，喺1993年開始，邀約咗嚟自香港、台灣、中國內地同海外華人聖經學者同語文專家，根據原文聖經，重新翻譯一本既準確又可讀性高、用現代嘅語文表達嘅譯本。《新約．新漢語譯本》同《五經．新漢語譯本》分別喺2010年4月同2014年7月出版，廣受教會牧者同信徒讚賞。

聖經‧新普及譯本

《聖經．新普及譯本》直接由英文聖經New Living Translation翻譯過嚟，係一本清晰、易讀、情感豐富嘅現代譯本，新舊約全書喺2012年7月出版，幫助讀者明白經文信息，適用於速讀聖經、靈修默想、傳福音、栽培初信者，深受教會同信徒歡迎。

聖經培育

漢語聖經協會為幫助唔同背景、年齡、知識水平嘅華人信徒群體，提供合適嘅聖經讀本同研經工具；幫助信徒更加明白聖經，並將經文應用喺生活之中，漢語聖經協會翻譯、撰寫同出版咗各類主題聖經，包括靈修版、職場事奉版、領導事奉版、生命成長版、研讀本聖經，亦有針對年輕人嘅青年版、女性基督徒嘅姊妹版聖經，藉此讓經文信息進入唔同信徒群體嘅生命。除咗書本以外，亦以唔同電子媒介，研發流動應用程式「漢語聖經App」，提供各類聖經資訊同學習資源，畀信徒同希望認識信仰嘅朋友學習聖經。

聖言中心

聖言中心喺2007年1月啓用，致力忠於聖經嘅教導，為教牧、教會領袖同有志追求聖經真理嘅信徒提供唔同類型嘅聖經培訓、講座同研經課程，推動研經同讀經。

聖經外展

送贈聖經

漢語聖經協會出版聖經單行本、節期福音冊子、福音揮春同利是卡，透過教會、機構同個人，將福音信息送達到香港以致海外華人福音對象。

外展活動

外展活動嘅目的係將聖經信息深印喺人心中，事工包括聖經朗誦節、學校聖經科獎勵計劃、贈經大使、接受教會同各基督教機構邀約舉辦聖經專題講座同課程等，將聖經信息帶到人群當中。