潘屋

22°26′43″N 114°02′27″E / 22.44528°N 114.04083°E / 22.44528; 114.04083

潘屋係香港一座大宅，喺新界元朗凹頭，博愛醫院嘅側邊，喺1932年起。1985年被評為香港一級歷史建築，並喺2010年2月4號獲確認評級^[1]。

史

潘屋係香港20世紀初原籍廣東梅縣嘅客家商人潘君勉為咗紀念佢阿爸潘蔭華而起，所以當時起名叫「蔭華廬」。潘君勉係旅港嘉應商會始創辦人同香港南洋輸出入商會首名主席，曾經捐錢支持同盟會進行革命嘅活動同資助起博愛醫院。當時中共領導人葉劍英係潘君勉嘅好友，佢同周恩來1938年喺香港嗰時就曾經入住潘屋^[2]。此外，作家郭沫若亦喺1939年入住過潘屋^[3]。香港日治時期，潘屋曾經被日軍徵用做憲兵指揮辦公室，係元朗軍事總部。1983年，當時在任港督尤德夫人曾經入過潘屋參觀，而古物古蹟辦事處喺1985年將潘屋評為一級歷史建築。

建築特色

潘屋用傳統客家設計起，潘君勉由家鄉梅州請咗4個工匠嚟香港，模仿祖屋「蔭華廬」嘅佈局，屬於「兩堂兩橫」典型設計，係孫天朗師傅做指導，由潘君勉嘅第二仔潘懋賢全權監督，工程嘅材料喺廣州、佛山、汕頭等地方買入運番香港，起咗兩年先至起好。

潘屋大宅前面有一個晾曬場，之前挖咗個半圓形嘅風水池。潘屋正門上面「蔭華廬」三個字匾額，所以又叫「蔭華公祠」，而正門兩邊樑架之上分別雕有一對貼金嘅木獅子，而牆上面又有兩對上咗色嘅陶獅子，上下左右一共有8隻咁多，故又名叫「獅子屋」。屋裏面正廳正樑寫住「百子千孫」、「如意吉祥」字樣，前堂就有「富貴壽考」四字匾，其下面有桃花貼金屏風，全屋一共有16間房、6個廳堂同兩個內院。

「蔭華廬」匾額
樑架上嘅貼金木獅子
牆上嘅著色陶獅子

近年發展

1980年代初博愛醫院計劃進行擴建工程，用以應付元朗新市鎮嘅醫療需求。工程曾經計劃拆咗潘屋，但最後得以保留。1990年代，中共全國政協常委徐展堂家族買入潘屋同相連土地，曾喺1996年計劃發展私人住宅，但到最後取消咗。到咗2010年，徐展堂家族向城市規劃委員會申請喺潘屋旁邊空地起五層高嘅私人骨灰龕場^[4]，引起附近居民嘅反對。

參考

↑ "List of the Historic Buildings in Building Assessment (as of 22 March 2011, #28)" (PDF) (香港中文). amo.gov.hk. 2011-03-22. 原著 (PDF)喺2011年5月27日歸檔. 喺2011-06-17搵到. {{cite web}}: Italic or bold markup not allowed in: |publisher= (help)
↑ 潘屋80年歷史周恩來曾入住互聯網檔案館嘅歸檔，歸檔日期2011年1月1號，.，《明報》，2010年12月28號
↑ 葉劍英郭沬若曾入住互聯網檔案館嘅歸檔，歸檔日期2011年1月1號，.，《星島日報》，2010年12月28號
↑ 元朗潘屋申建骨灰龕，《明報》，2011年5月30日

出面網頁

[1] "List of the Historic Buildings in Building Assessment (as of 22 March 2011, #28)" (PDF) (香港中文). amo.gov.hk. 2011-03-22. 原著 (PDF)喺2011年5月27日歸檔. 喺2011-06-17搵到. {{cite web}}: Italic or bold markup not allowed in: |publisher= (help)

[2] 潘屋80年歷史周恩來曾入住互聯網檔案館嘅歸檔，歸檔日期2011年1月1號，.，《明報》，2010年12月28號

[3] 葉劍英郭沬若曾入住互聯網檔案館嘅歸檔，歸檔日期2011年1月1號，.，《星島日報》，2010年12月28號

[4] 元朗潘屋申建骨灰龕，《明報》，2011年5月30日

[1]

[2]

[3]

[4]