烏利爾

烏利爾（希伯來文：אוּרִיאֵל‎，英文：Uriel，希臘文：Ουριήλ，科普特文：ⲟⲩⲣⲓⲏⲗ；東正教譯作鄔里伊爾；天主敎譯優禮）係猶太教同基督宗教入面嘅一位天使長（大天使），佢個名意思係「神之光」或「神之燄」。佢唔被羅馬天主教官方認可，原因係天主教會只承認《聖經》正典所提及嘅三位大天使：米迦勒、加百列同埋拉斐爾；但儘管如此，對佢嘅崇敬喺菲律賓同拉丁美洲天主教會入面仍然頗為流行。聖公宗尊烏利爾為藝術同堅振聖事嘅主保天使；俄羅斯正教會視佢為科學及諸藝嘅主保。佢喺猶太教及基督教神祕主義文學、神祕學、次經入面亦係一位重要嘅天使長。

烏利爾
英倫聖公會聖約翰堂入面嘅馬賽克鑲嵌畫
總領天使（大天使、天使長）
敬奉於	猶太教、聖公宗、東正教、東方正統教會、東儀天主教會、民間天主教、祕傳基督教
慶節	9月29號（西方基督教） 11月8號（東方基督教） 7月28號（埃塞俄比亞教會）
象徵	羽翼、日輪、書本、卷軸、提燈、掌中之火、烈燄聖劍
主保	詩、諸藝、科學、堅振聖事

喺基督教諾斯替教派經文，以及舊約聖經時代嘅偽經《埃塞俄比亞文以諾書》（The Ethiopic Book of Enoch）、《以斯拉續篇下卷》同新約聖經時代嘅偽經《彼得啟示錄》入面，個名字有被提及。文中佢向先知以斯拉傳授玄學嘅內涵，同埋哲學問題嘅解答，協助以斯拉同上帝進行意味深長嘅對談。

畫廊

• 
  埃及科普特正教會懸空教堂入面嘅壁畫
• 
  美國國會圖書館入面嘅壁畫
• 
  帕拉多霍黃金琺瑯祭壇入面嘅烏利爾像
• 
  英倫聖公會聖米迦勒暨諸天使堂入面嘅彩繪玻璃窗
• 
  英倫聖公會甘士比座堂入面嘅彩繪玻璃窗
• 
  英倫聖公會牛環聖馬田教堂入面嘅彩繪玻璃窗
• 
  墨西哥天主教普埃布拉座堂入面嘅彩繪玻璃窗
• 
  佩戴全視之眼頭冠嘅烏利爾雕像，1898年

睇埋

• 聖公會聖烏利爾堂

出面網頁

• Jewish Encyclopaedia: Uriel （英文）
• Encyclopaedia Britannica: Uriel （英文）