無厘頭
無厘頭（粵拼：mou4 lei4 tau4），原本成句或者係「莫釐頭尻」。「尻」字最原本係解䊆屁股嘅骨——「說文解字：尻，臀也。」。而「無厘頭尻」原意係指啲人頭尾不分，亂晒大籠，唔知做乜，後尾因為個「尻」字等同㞗字發音相同，所以先畀人用嚟噉用。其實原本呢個字係粗口，但係因為冇人注意，而且聽落去都唔似，變成咗一個流行話。
另一個可能來源係來自無來頭（「來」讀lei4），即係唔知邊度來。
依家嘅「無厘頭」，意思同樣係鬧人講嘅嘢同埋做嘅事不知所謂，無聊到冇人有，又或者發生咗嘅嘢根本搞唔清來龍去脈，令到人一頭霧水。後來「無厘頭」呢三個字喺香港嘅電影入面出現，於是乎廣泛咁傳揚開嚟，甚至成為一種電影風氣，繼而影響埋社會意識形態，有所謂「無厘頭文化」。
無厘頭文化嘅特色係經常將講嘢嘅字詞誇張咁演釋，或者講埋晒啲同主題風馬牛唔喇更（牛頭唔答馬咀）嘅嘢，有時講緊嗰陣重要配合埋啲誇張嘅形體或者面部動作，目的係要令原本好簡單嘅說話或者訊息兜個大圈，搞到啲人唔知唔明一味得個估字。
香港電影人周星馳好擅長呢種誇張嘅演釋，佢將無厘頭呢種意識形態喺電影電視裏面大肆發揮，變成一種喜劇元素；睇返喺佢初期嘅電視或者電影作品裏頭，經常都會出現無厘頭嘅說話同埋形體動作嚟引人笑，於是就俾大眾公認為無厘頭文化嘅祖師爺。
因為周星馳嘅影響，而家「無厘頭」呢個詞亦都畀國語用咗去，喺粵語以外嘅語言都會用到呢個詞。
時至今日，「無厘頭」呢三個字雖然都重係一個貶義詞，但因為後面嗰個「尻」字慢慢咁俾人淡忘棄用，經過日子同埋社會形態嘅洗擦同打磨之後，基本上已經冇乜攻擊性，脫離咗粗俗語言嘅行列而成為一個普通嘅形容詞。
其他「無厘頭」
編輯雖然話「無厘頭」無冇點話清楚佢嘅定義，正因為噉，所以呢個詞成日俾人亂咁用。
