㞗
提示：呢篇文講嘅唔係尻。
呢篇文講「㞗」嘅語文方面。想搵「㞗」嘅科學方面嘅話，請睇人脧。俗寫
編輯因為唔少電腦唔支援個「㞗」字，所以啲想要語氣傳神嘅人，喺網絡上一般會以同音嘅「鳩」字嚟假借之。另外有唔少人用個新造嘅，乎合形聲原則嘅𨳊字；縱使其實佢古時已經有，乃至於讀音亦雷同，只得意思冇關。除此以外，以為「尻」字係正寫嘅都唔少，於是就誤用咗佢嘞。其實「尻」解做髖骨或者屎朏，通常讀「haau1」；雖然家陣個「尻」字喺某啲組合之中的確讀「gau1」，但係話唔埋都係由於撈亂咗兩者，再習慣成自然所致。
文典
編輯《異體字字典》：「……男性生殖器，方言中常用以罵人。……
《字彙．尸部》：「……㞗．渠由切音裘．男陰異名……」
《正字通》：「……俗字舊．註音裘．男陰異名泥……」[1]
綜合以上三項，古時「㞗」似乎係指整個男人陰部，不過亦有結論唔同嘅考證；例如彭志銘認為個字齋指陰莖。由於經常被粵人用作虛字來抒發情緒，而甚少表達實物，以至家陣冇乜人知或者理佢原本究竟解乜。現代粵語之中，每當要準確傳意，往往會揀官話詞語。[2]
《不文集》：「……九是大而硬的，不應為而為，不應硬而硬者，叫戇九。……」[註 1][3]
以上指出，同「𨳍」以及「賓周」相比，「㞗」用來鬧人時，往往帶啲失控、魯莽同衝動嘅意思。
用法
編輯- 作名詞用，「陽具」嘅意思，量詞係「條」或者「碌」。例子：
- 留得碌㞗在，那怕冇女屌！
- 睇吓邊個條㞗大啲？
- 語氣助詞，本身冇意思，用作加強語氣。例子：
- 屌㞗你！（加強「屌你」嘅語氣。）
- 多㞗餘（加強「多餘」嘅語氣。）
- 點㞗樣呀你？（加強「你想點樣」嘅語氣。）
- 用以加強堅決嘅語氣，例子如下：
- 是㞗旦／求㞗其（冇所謂，隨便嘅意思；有「唔好再問我」嘅意味。）
- 罷㞗就（就咁算數；有「唔會再有第二次機會」嘅意味。）
- 話㞗之你（隨便你；有「堅決唔再理會」嘅意味。）
- 戇㞗（戇吓戇吓嘅意味）
- *助詞，可以作為顛倒句子意思。例子：
- 有㞗嘢玩！（冇嘢好玩。）
- 有㞗女望！（冇女好望。）
- 形容詞（1），形容呆頭呆腦嘅樣。例子：
- 㞗下㞗下（呆滯笨拙。）
- 形容詞（2），形容人奸狡無良嘅時候，前面通常會加個𡳞字；或者形容冇主見而令人覺得好麻煩嘅人。例子：
- 條友仔好𡳞㞗！（嗰個人好鬼死奸狡。）
- 條友仔諗嚟諗去都唔知想點，㞗到死！（嗰個人唔知佢諗想點，好鬼死麻煩。）
文法
編輯講粗口嘅時候，「㞗」字同「𡳞」字意思同性質係好似，都係好少單獨字咁使用，多會夾雜喺句子中加強語氣，文法同「𡳞」字一樣，基本上可以同「𡳞」字互換嚟用或者一齊用。例子：
- 好悶呀！ → 好㞗悶呀！／好𡳞㞗悶呀！（好鬼悶！／悶到發神經！）
- 我話之你死 → 我話㞗之你死（我決定唔會再理你）
「㞗」作名詞用嘅其它例子
編輯㞗細冇女要，㞗長俾狗噍：市井創作俗句之一，意思即係：陽具好細冇女性會接受，陽具大就會俾狗咬噬。
「㞗」作助詞用嘅其它例子
編輯打㞗佢：狠狠噉打佢一餐。呢個比起「打佢一餐」嚟得更狠更用力。
「㞗」作形容詞用嘅其它例子
編輯戇㞗㞗／戇𡳞㞗：愚昧笨拙到唔識形容。
配搭
編輯㞗毛：陽具上嘅陰毛。
戇㞗：愚昧笨拙，多數用嚟鬧人講咗（或做咗）冇意義或者無聊嘅話（或者事情）。
戇㞗仔／佬／妹：意思同上，用嚟形容人嘅名詞。
㞗屎：多數形容嗰啲一朝得志就乘機晒命，不可一世嘅人，有所謂「㞗屎撐撐」；亦有形容狡猾講大話，或者麻麻煩煩嘅人。例句：呢條友仔成身名牌揸住架波子，你睇佢幾咁㞗屎！（呢個人成身都係名牌兼渣住架保時捷跑車，你睇佢嗰個不可一世嘅衰樣！）。喺2006年，香港人喺 MSN 用語中將「㞗屎」講成「9s」。
㞗噏：胡言亂語唔知講乜、作大、信口開河嘅意思。「噏」讀作「up7」中文輸入嘅人會寫成「9up」。
好㞗雀躍：照字面解，好嘅陽具應該好似生猛嘅雀仔咁活躍；但一般係用嚟形容萬分高興嘅情緒。
唔㞗化：思想守舊古板，唔開化。
㞗芝媽碌：形容人講嘢語無倫次雜亂無章，或者做事一塌糊塗。
搲𡳞晒㞗頭：其實係由「搲（we² 或 wah²）晒頭」演變出嚟，抓爛頭皮諗極都諗唔明嘅意思；呢句係比諗極都唔明更加犀利誇張嘅形容詞。
㞗埋一堆：莫明其妙嘅組合詞語，意思即係走埋一齊，聚埋一堆，尤其是指嗰啲烏合之眾。例句：你咪同班專搞事嘅古惑仔㞗埋一堆啦！害㞗死你呀！（你唔好成日群埋嗰班專搞事嘅黑社會份子啦，盞俾佢哋害到你雞毛鴨血呀！）
引申
編輯啲人口講時，若果要令語氣稍微禮貌些少，通常會讀歪成「蹺」（kiu3*1）。喺互聯網道，啲人為免發帖或訊息被系統阻礙，週不時會用諧音或同音嘅代替品——最簡單嘅有漢字「九」、數字「9」同英文字母「Q」等；除此以外，重有更得意，以下嘅創作。
「膠」
編輯一路以嚟，坊間都通俗咁流傳用個「膠」字嚟引申或者暗示「㞗」，例如有人會講：「你咪亂膠咁講呀」、「咪成舊擦膠咁企喺度啦」、「黐膠花」（引申自「黐㞗線」）。
圖案代表
編輯喺網絡社會入面，有人就將「戇㞗」讀諧音變成「硬膠」，再簡化成一個「膠」字搬出嚟用，而且有人仲用咗圖畫嚟搞鬼，整咗個小丑公仔嚟做「膠」字嘅專用圖像，如果喺咩網頁咩論壇度見到一個正圓嘅白色面，十字眼，紅紅大鼻同展笑大咀嘅圖案，咁佢多數係代表話人戇㞗嘅小丑神／膠神嘞。
註腳
編輯- ↑ 字字原文，毫無更改。
參考
編輯- ↑ 〈存档副本〉。原先內容歸檔喺2021年6月2號。喺2021年6月19號搵到。
- ↑ 〈【專題籽】從康熙字典查起 粵語粗口9問9答 ｜ 蘋果日報〉。《Apple Daily 蘋果日報》 (香港中文)。原先內容歸檔喺2021-06-01。喺2021-06-19搵到。
- ↑ Huang, Zhan; 黃霑. (1996). Bu wen ji. Sze Ma Wong (第Di 59 ban版). Xianggang: Bo yi chu ban ji tuan you xian gong si. ISBN 962-17-4618-3. OCLC 122729839. 原先內容歸檔喺2021年8月26號. 喺2021年6月19號搵到.