無綫電視慈善節目
無綫電視慈善節目（英文：TVB Charity Shows）係指香港無綫電視每年為香港大型慈善機構舉辦嘅籌款節目，多數喺禮拜六夜晚播，當中最大規模同最出名係每年12月頭搞嘅《歡樂滿東華》。
一覽
編輯年度籌款節目
編輯| 播映日子 | 節目名 | 受惠機構 |
|---|---|---|
| 1月 | 《慈善星輝仁濟夜》 | 仁濟醫院 |
| 3月 | 《博愛歡樂傳萬家》 | 博愛醫院 |
| 5月 | 《萬眾同心公益金》 | 香港公益金 |
| 6月 | 《明愛暖萬心》 | 香港明愛 |
| 9月 | 《星光熠熠耀保良》 | 保良局 |
| 10月 | 《善心滿載仁愛堂》 | 仁愛堂 |
| 12月 | 《歡樂滿東華》 | 東華三院 |
其他年度節目
編輯每年年初一晚，翡翠台直播完香港新春花車巡遊之後，都會安排播保良局嘅賀歲節目，個節目名年年唔同。
爭議
編輯藝人表演被逼倒貼善款
編輯有藝人曾經試過，落力籌款後，因為本來應承捐錢嘅人無履行承諾，結果要自掏腰包倒貼善款。其中，受害嘅藝人包括有魯振順同王俊棠等[1]。
對慈善機構收取高額製作費
編輯無綫雖然喺一啲年度報告入面將製作呢啲節目列作佢哋履行社會責任嘅一部分，但係有啲慈善機構就批評，其實後面收取高額製作費。其中喺2014年初嘅《慈善星輝仁濟夜》，喺節目前夕就忽然被加收30萬製作費。當時嘅仁濟顧問局副主席鄭承隆就形容做法唔尋常，而仁濟醫院副主席林煒珊就被報導試下向無綫反映不滿，而香港浸會大學新聞系助理教授杜耀明回應事件嘅時候亦話有關做法令人懷疑[2]。
另外，財經專欄作家渾水亦曾經寫文章，提到自己私下同一名年輕慈善機構嘅總理朋友討論呢啲籌款節目。渾水批評籌款節目行禮如儀，又引述該名總理朋友，批評安排周柏豪對失業家庭唱《一事無成》太過份，製作費每一年都加，質素就冇相對應提升[3]。
呢啲批評，去到香港反送中運動期間，一啲運動參與者（特別係無線電視嘅反對者）不時會將呢啲問題再攞出嚟[4][5]。
表演揀錯歌被批評
編輯喺呢啲節目入面，曾經唔止一次發生無綫嘅編審同監製揀咗一啲歌要歌手獻唱，當中歌詞內容唔恰當，比一啲人批評。
其中2021年5月嘅《萬眾同心公益金2021》，周柏豪同鄭融對住失業家庭唱《一事無成》，其中歌詞「假如凡事都失敗」、「幾年來毫無成績，地位未有躍升」等，被網民批評涼薄。另外泳兒喺同一個節目亦揀咗自己當時嘅新歌《孤毒》，仲要係喺播放獨居長者受訪片段之後，不過泳兒之後呼籲大家捐錢嘅時候就話多啲人打電話支持，等多啲人得到溫暖就唔會孤獨，化解揀錯歌嘅尷尬[6][7]。
另外，喺2008年《星光熠熠耀保良》嗰陣，吳雨霏同鄧麗欣表演嘅時候，獻唱《分手要狠》，當中歌詞有一句「別扶助病困」，亦有倒米之嫌[6]。
參考
編輯- ↑ 〈家燕姐揭卡拉之星失蹤之謎 魯振順王俊棠被走數嚇怕 ｜ 蘋果日報〉。web.archive.org。2021-01-25。原著喺2021-01-25歸檔。喺2023-09-12搵到。
- ↑ 〈玩殘慈善團體 TVB左手捐錢 右手加30萬製作費 | 蘋果日報•聞庫〉。《聞庫》。2013-12-19。喺2023-09-03搵到。
- ↑ 〈【摸魚手札】籌款活動缺乏競爭 - 渾水〉。《蘋果日報》。2021-06-01。
- ↑ 〈慈善機構總理：TVB籌款節目製作費年年加，但質素就冇提升〉。《LIHKG 討論區》。喺2023-09-03搵到。
{{cite web}}: CS1 maint: url-status (link) - ↑ 〈《一蚊都唔好捐畀公益金，其他慈善機構都係❌》〉。2021-06-01。
{{cite web}}: CS1 maint: url-status (link) - ↑ 6.0 6.1 〈孖鄭融鼓勵失業家庭揀錯歌 周柏豪唱《一事無成》 被嘲涼薄 | 蘋果日報•聞庫〉。《聞庫》。2021-05-31。喺2023-09-03搵到。
- ↑ 〈全城圍插丨周柏豪唱《一事無成》為失業家庭打氣 網民改詞嘲諷 | 蘋果日報•聞庫〉。《聞庫》。2021-05-31。喺2023-09-03搵到。