餺餦

餺餦（粵音：bok³caang¹）係古代就有嘅一種嘢食，係煎餅嘅一種，大致可分為鹹餺餦同甜餺餦兩種。

廣東家鄉煎餺餦

叫法同讀音

「餺餦」兩個字少人識，所以有好多其它寫法。有人認為餺餦好薄，又同嘢食有關，所以就寫成「薄餐」，連個音都變埋做bok³caan¹。另外亦有人認為餺餦係用鐺來煎，所以寫成「薄鐺」或者「薄罉」。重有人寫成「薄撐」等等。

餺餦呢樣嘢本身都有多種叫法，比如順德話就根據佢個形叫做「睡鋪」。

做法

餺餦嘅主要材料有糯米粉粘米粉加水開成嘅粉漿同餡。鹹薄鐺嘅餡包括韮菜同蝦米，落食鹽同胡椒粉調味；甜餺餦嘅餡包括花生碎、白芝麻同椰絲，落砂糖調味。