犯罪故仔

犯罪虛構故仔（英文：crime fiction），或者簡稱犯罪故仔（crime story），係虛構故仔一個文類，背景設定可變（不過主流係設喺當代社會），故仔集中於罪案以及對罪案嘅調查，主角通常會係警察或者偵探等嘅人物（即係會以「解決一單罪案」為目的嘅人），情節會涉及某啲有返咁上下嚴重嘅罪案（例：謀殺）。有學者認為，人對犯罪故仔嘅興趣源於佢哋對反社會嘅人嘅又恨又好奇－好奇，所以先會想透過睇同呢啲人有關嘅故仔，知多啲有關佢哋嘅嘢。

福爾摩斯同佢助手莊·華生嘅圖畫

公式化

犯罪故仔係一個比較公式化嘅文類：喺一個典型嘅犯罪故仔入面，作者首先會以一啲濕碎嘅嘢開頭，例如係主角返工嘅一日，靠呢啲濕碎嘢發生嗰陣啲角色之間嘅對話、流露嘅情緒同行為，俾讀者對呢班角色同背景設定有基本嘅了解；然後做個故仔重心嗰單罪案就會發生，而主角同其他重要嘅角色會涉及喺單案嘅調查當中，而喺調查期間往往會有角色發展－例如喺調查一輪之後，啲線索引領主角去到一個佢朋友唔願意去嘅地點，呢個地點提供咗新線索，同時主角個朋友終於講出佢點解唔願意去呢個地方，而呢場對話揭示嗰個角色一啲不堪嘅過去；最後結局通常係破案，拉到個犯人，不過都有好多犯罪故仔講最後犯人都係走甩嘅。

子文類

犯罪故仔有以下呢啲子文類：

• 偵探故仔係犯罪故仔嘅一個子文類，主角係－專業、業餘、或者退咗休嘅－偵探，負責去查一單案；偵探故仔嘅異型舖排如下：主角同若干個角色出場，做一啲相對濕碎嘅嘢，等讀者對佢哋有基本嘅了解；跟住罪案發生，在場嘅眾人每個都有嫌疑；主角會由各人身上攞口風同搵證據；最後主角憑住佢嘅推理，搵出犯人係邊個。偵探故仔出名嘅作品有《福爾摩斯》同《名偵探柯南》等。
  • 密室推理係偵探故仔一種，廣義上係指個故仔嗰單案（幾乎一定係謀殺）就噉望落好似係冇可能做得到嘅；最簡單嘅例子係，眾人喺一間房入面發現其中一個角色死咗，間房道門係由入面鎖住咗嘅，而且間房冇任何其他出口（密室）－即係話就噉睇，犯人冇可能可以殺死個受害人再離場同鎖起道門。
• 法證故仔係犯罪故仔嘅一個子文類，主角係法證相關嘅人員，唔係好似用偵探故仔啲主角噉齋靠推理，而係使用法證上嘅技術（例如驗屍等）嚟搵出犯人。

睇埋

• 恐怖故仔
• 嘥巴鬅

拎

• World's Best Detective, Crime, and Murder Mystery Books.