狗頭人

狗頭人（英文：Cynocephaly）係歐洲傳說中住喺印度同埋非洲嘅狗首人身種族。西元前四世紀末，古希臘歷史學家克特西亞斯喺《印度史》（Indica）入面介紹咗狗頭人，佢哋頸以下係人類，頭部係狗仲有條毛鬙鬙sang1 sang1嘅長尾。狗頭人嘅文明水準唔高，以狩獵維生，鐘意肉類、牛奶、水果等等嘅食物。

狗頭人

狗頭人嘅畫像，出自《紐倫堡編年史》

《印度史》記載嘅狗頭人

狗頭人平時住喺洞穴入面，會用狗一樣嘅姿勢性交。對佢哋嚟講，用其他姿勢交配係一種恥辱。佢哋嘅壽命好長，大概有一百七十歲，亦都有部分人可以有二百歲命。狗頭人嘅社會通常係用以物易物嚟交易，佢哋會將儲落嚟乾燥生果或者琥珀畀印度國王，然後用嚟換小麥、衣服、狩獵用嘅弓箭同長槍。另一方面，印度國王每五年會送三十萬把弓、三十萬枝標槍、十二萬面盾牌、五萬把劍畀狗頭人嘅部落。因為佢哋正義感強、體能強勁，所以國王就定期送武器畀佢哋，將狗頭人部落納入自己嘅軍隊。

真實嘅狗頭人

事實上，狗頭人嘅真身有可能只係狒狒。當時嘅古代旅遊者將狒狒誤當成人類部落，再經過多次嘅傳播、誤解先至演變成狗頭人嘅傳說。

參考資料

• 奇幻不思議！揭開傳說中亞人種的神秘面紗，密田憲孝著，TEAS事務所出版，王美娟譯，ISBN 978-986-331-606-0