理想化

  提示：呢篇文講嘅唔係最佳化。

理想化（英文：idealization）喺科學哲學上係指一個理論模型作出一啲能夠令分析簡單易做啲、但查實唔符合現實嘅假設。

概論

有人喺度計數，分析人造衛星點圍住地球轉。佢將地球想像做一個橢球－但地球其實只係「大致上橢球形」。

舉個例說明，地球查實唔係完美嘅球體，亦唔係完美嘅橢球（橢球簡單講即係撳扁咗嘅球體）－就噉用常識諗都知，地球表面有好多山同海，反映咗地表查實有好多凹凹凸凸嘅位，而第啲行星都係同樣嘅道理；但係响現實科研當中，研究者郁手計數嗰時成日都會將地球當正係個橢球噉分析－

• 簡化假設會令計算結果同實際結果唔完美吻合；但同時
• 簡化假設可以令啲數冇咁難計；

噉即係話，如果計算結果離實際結果唔係太遠，簡化假設整體上依然係有利嘅。

爭拗

睇埋：球狀乳牛

科學家做研究嗰陣，幾乎實會做理想化。有陣時可能會出現一個情況：有位科學家計數嗰陣做咗啲假設，但佢嘅同行覺得啲假設簡化得滯，引起「喂，你呢份研究啲假設咁簡化，計到嗰啲結果係咪真係描述到現實㗎？」噉嘅質疑。

睇埋

• 幾何
• 過適
• 抽象化