白鋼

白鋼（亦叫不鏽鋼或者不銹鋼）（英文：Stainless Steel、inox steel或者inox，出自法文inoxydable）係鋼一種，係種合金。冶金學來講，按重量計，鋼含至少百分之10.5到11嘅鉻。

用白鋼造嘅煎Pan

白鋼唔係真係完全唔會生鉎，但係白鋼唔似得普通鋼咁易腐蝕生鉎。白鋼夠鉻嘅話，表面會生𤗲氧化鉻薄膜，免受外界環境腐蝕，尤其係空氣中嘅氧氣、水、某啲酸、鹼嘅氧化。

史

印度德里鐵柱係出名嘅古跡，佢同現代嘅白鋼相似嘅地方係能夠抵抗鉎蝕。但係德里鐵柱唔同現代白鋼，佢裏面有嘅唔係鉻，而係磷。佢係靠佢裏面嘅磷，令鐵鉎（氧化鐵）同磷結合，產生一𤗲保護膜。

1892年，法國人Pierre Berthier發現鐵鉻合金可以抵抗酸性腐蝕。只不過當年嘅治金技術造唔到好似現代白鋼咁嘅鋼材，當年嘅鐵鉻合金好多都太脆弱。

1890年代尾，德國人Hans Goldschmidt開發鋁熱劑處理（aluminothermic process）產生「無碳鉻」。

1904年到1911年之間，經過反覆研究，法國嘅Leon Guillet製造出可以被稱為白鋼嘅合金。