盜版黨

盜版黨（瑞典文：Piratpartiet）係瑞典一個政黨，專針對知識產權嘅各種問題，包括版權、專利，所有涉及保護知識產權嘅嘢都係佢哋關心嘅議題，佢哋認為而家嘅版權制度已經過時，唔應該無止境咁限制知識發放。除咗咁，佢哋另一樣關心嘅係加強私隱保護，包括私人財產同個人資料在內，呢兩樣議題都係互聯網上普遍發生嘅嘢。由於佢哋關心嘅議題都只係得呢兩樣，所以佢哋唔會以左翼或右翼做定位。

盜版黨標誌

簡史

喺瑞典有幾個鍾意喺網上下載嘅人，覺得好多企業成日拎版權法出嚟做金牌，阻礙知識流通，尤其係網上下載文件，受到好多限制。於是喺2003年，呢班人就自己組咗個團體，支持互聯網上檔案互相分享合法性。

呢個組織本來唔係一個正式組織，不過喺2006年瑞典，佢哋就變咗做瑞典無議會席位嘅政黨之中最大嘅黨，而且佢哋嘅觀點亦有好多人支持，好似喺美國、法國、意大利、德國、比利時呢啲國家都有人有樣學樣搞盜版黨。

理念

盜版黨認為，而家嘅版權制度已經過時，好多企業利用版權限制知識發放，局限咗好多創造性工作。所以喺網上分享電影、音樂等等呢啲嘢唔應該犯法。

瑞典盜版黨主席 Rickard Falkvinge 話：「盜版黨最終目的係發起全球知識產權革命，已經有好多國家成立咗盜版黨，如果再拎到國會議席，我哋一定會令全世界刮目相看。」

佢哋覺得美國電影協會（Motion Picture Association of America, MPAA）同埋美國唱片工業協會（Recording Industry Association of America）郁啲就告人，又唔畀人用 P2P，重成日要人捐錢贊助反盜版行為，為咗自己利益而不擇手段，直情係科技進步同個人自由最大阻礙。

爭議

對於盜版黨出現，美國就曾經以官方形式向瑞典政府施壓，要佢哋一定要搞掂呢班友，如果唔係就將瑞典列入世界貿易組織黑名單。結果喺2006年5月瑞典警方突襲盜版港（Pirate Bay）網站總部，拉咗兩個高層。但係個網站停咗幾日之後又開返，不過改咗去荷蘭做總部。