音樂

音樂jam1 ngok6（英文：music）係一種有組織性嘅聲，涉及作曲嘅人喺時間當中編作聲－一首音樂會通過運用音高、和音、節奏、旋律同音色等嘅元素嚟安排一段段嘅聲，務求令聽嘅人有賞心悅耳嘅感受。音樂理論（music theory）上嘅研究會對呢啲唔同嘅音樂元素作出分析，嘗試了解唔同嘅音樂元素組合會點樣影響一首音樂「有幾好聽」。

音樂
一座古董鋼琴；鋼琴係古典樂最重要嘅樂器之一，喺廿一世紀初無人不曉咁滯。
方法	聲
種類	曲種
起源文化	各式各樣
起源喺	舊石器時代

對於人類嚟講，音樂不嬲都係文化嘅重要一環：音樂可以係一門藝術，會由美學嘅角度嚟思考一段聲點樣先至算係「有美感」，而且好多人都會視聽音樂同演奏音樂做一種娛樂，由音樂當中得到樂趣；除此之外，音樂有陣時仲可以有藝術以外嘅文化意義，例如著名芭蕾舞劇《胡桃夾子》當中嘅樂曲就俾好多人同聖誕節聯想埋一齊，所以喺北美洲等地，好多人一到聖誕就會攞《胡桃夾子》當中嘅樂曲嚟周圍播，營造聖誕氣氛。又有啲音樂會俾人攞嚟做重要儀式嘅一部份。

音樂同舞蹈之間嘅關係極之密切：喺廿一世紀初，絕大多數嘅舞種傳統上都係會跟住音樂嚟跳嘅－跳舞嘅人都會想用音樂；而事實亦表明，人喺聽到音樂嗰時，成日都會不自覺噉身體某啲部份（例如腳板）開始跟住音樂嘅節奏郁動－音樂自然令人想跳舞。

定義問題

喺樂理上，啲人好睇重一條定義上嘅問題：

「

何謂音樂？

」

呢條問題就噉睇好似好簡單，但就算到咗廿一世紀初，音樂嘅定義喺音樂哲學（philosophy of music）上都仲係一條廣受爭議嘅問題。例如喺廿世紀曾經有人主張音樂可以定義做有組織性嘅聲（organized sounds），但人講嘢產生嘅聲都係一種有組織性嘅聲（語言會有文法，指定邊啲句子可以接受邊啲句子唔可以）－即係話個定義包埋一啲直覺上認為應該唔屬於音樂嘅嘢，所以唔可以攞嚟做音樂嘅定義。又有啲定義嘗試由美感嘅角度出發，將音樂定義做「有組織性得嚟又有美感嘅聲」，但又有個問題係美感呢家嘢相當主觀，而一般認為定義最好應該係要客觀嘅。

分類

音樂可以按好多準則分類：

• 首先音樂有得按「有冇人聲」分做器樂同歌，當中器樂係指完全冇人聲、齋靠樂器嚟創造嘅音樂，而歌係指有人聲跟住唱嘅音樂；
• 另一方面，音樂又可以按音高同節奏等嘅音樂元素特性嚟分做唔同嘅曲種，例如華爾滋（Waltz）就出嗮名興用三拍子（一種節奏特性）而且啲旋律令人有「飄浮無重」嘅感覺。唔同風格或者類型嘅音樂可能會強調、唔強調或者省略其中一啲元素。
• 舞曲係指專門作嚟俾人跟住跳舞嘅音樂，例子可以睇華爾滋同芭蕾舞音樂。
• 粵樂出嗮名「音色清脆明亮，節奏活潑歡樂」。
• 夜曲泛指題材上同夜晚有關嘅樂曲。

相關能力

• 節奏感
• 音樂感

睇埋

• 舞蹈
• 樂器
• 語言
• 音樂心理學

拎

• BBC Blast Music For 13- to 19-year-olds interested in learning about, making, performing and talking about music.
• The Virginia Tech Multimedia Music Dictionary, with definitions, pronunciations, examples, quizzes and simulations
• The Music-Web Music Encyclopedia, for musicians, composers and music lovers
• Dolmetsch free online music dictionary, complete, with references to a list of specialised music dictionaries (by continent, by instrument, by genre, etc.)
• Musical Terms – Glossary of music terms from Naxos