相思病

  「相思」跳轉到呢度。想搵其他用法，請睇「相思 (搞清楚)」。

相思病即係兩個人深深相愛時，冇得到對方嘅回報或者對方唔喺度時就會有負面嘅感覺。由中世紀開始，呢種情況一直被認為係一種病嚟。隨住時間嘅流逝，呢種症狀會一直持續，包括冇胃口同埋失眠。

相思病呢個詞語喺醫學或者心理學領域雖然好少用，但係有關對身心嘅影響依家進行緊新嘅研究。

愛可以變成精神病

文學同埋詩歌經常將愛情寫成令人瘋狂，而且醫學界亦都採取咗類似嘅方法。根據希波克拉底醫學嘅觀點，充滿激情嘅愛情幾乎會消失或者變成「憂鬱嘅愛情」，呢種情況會令人沮喪同埋悲傷。當中熱情嘅愛係指「蜜月期」中嘅愛，通常係啱啱開始，但喺一兩年之後就會消失。隨之而來就係面對現實狀況，呢個時候就需要雙方去維繫關係。喺呢種情況下，如果呢個時候失去咗對方或者感覺唔到對方嘅愛，就會形成相思病。

患咗相思病嘅安提阿古斯一世

相思病唔單止係一種詞語上嘅表達，仲有研究指佢係一種實際上嘅疾病。1915年時，西格蒙德·弗洛伊德曾經提出：「我咃仲未明白墜入愛河係咩意思，但可以肯定佢係一種疾病同埋瘋狂、一種幻覺，係對所愛之人嘅盲目性。」

對相思病嘅科學研究發現，戀愛中嘅人所經歷嘅事情同埋可卡因等毒品所引起嘅狀態非常類似。喺大腦入面，某種神經傳遞素（例如：苯乙胺、多巴胺、去甲腎上腺素同埋催產素）利用咗大腦十二個不同區域，從「愛」或者「墮入愛河」中引起嘅高潮感。呢啲神經遞質觸發咗同苯丙胺相同嘅感覺。

就算相思病喺患者嘅感受中好普遍，但係心理學家唔會向精神科醫生轉介「相思病」。噉係因為相思病所常見嘅症狀往往同其他心理疾病有關，所以成日被誤診，亦有可能認為呢種精神狀態都係好基本嘅問題。但係，如果一個人處於相思病時唔去尋求幫助嘅話，噉樣係非常危險，因為普遍嘅人都知道愛情係能夠令人冇命。（後果可能係自殺，所以有唔少案例都證明咗愛情係可以令人冇命。）

Len Bowers教授喺佢嘅《心理疾病的社會本質》呢本書入面提出咗樣嘢，就算「精神病患者」嘅大腦入面存在住生理上嘅差異，但喺符合呢種差異之前，仲要符合埋其他幾個嘅條件。所以，可能有好多精神疾病（例如相思病）永遠都唔會有足夠證據去證明。

病徵

喺2005年，愛同相思病嘅研究人員弗蘭克·塔利斯登咗一篇文章，佢建議醫學專家應該係時候要重視相思病。相思係指發生喺一個人身上，代表住「真實、瘋狂、深入」噉愛一個人。同樣，健康專家都認為相思病會令人出現病態，所以應該更加要重視診斷嘅過程。 因為相思病本身好少被人當作心理健康問題，所以相思病嘅症狀通常會畀人誤診為其他各種疾病或者精神健康上嘅問題（例如強迫症）。

塔利斯列出咗相思病嘅常見症狀：

• 躁狂症
• 沮喪
• 噁心
• 哭
• 失眠，可能導致疲勞
• 缺乏專心
• 食慾不振或者暴飲暴食
• 壓力：高血壓、胸部同心臟疼痛、急性失眠、亦由「暗戀」引起
• 強迫症-專注同埋囤積一啲冇價值嘅物品
• 心理上產生嘅身體症狀，例如胃部不適、食慾改變、失眠、頭暈同埋神志不清
• 慢性頸痛、身體震顫、強迫性思想、頻繁嘅回憶。
• 快速嘅情緒波動

根據塔利斯嘅講法，相思病好多症狀可以歸類去精神疾病診斷與統計手冊第四冊同ICD-10（國際疾病分類）。強迫症係相思病其中一種嘅症狀，佢仲包括神不守舍、不斷檢查自己嘅手機、Facebook、囤積一啲冇價值物品。意大利精神科醫生Donatella Marazitti做過嘅另一項研究發現，當人墮入愛河嗰陣，佢咃嘅血清素水平會跌到強迫症患者嘅水平，而呢種水平明顯低過健康人嘅水平。

文學

威廉·莎士比亞嘅《羅密歐與朱麗葉》就寫咗有關「愛情」嘅瘋狂，以及兩個年輕而且好癡情嘅戀人感受到嘅悲傷。當羅密歐發現自己嘅愛人死咗之後（或者佢相信佢嘅戀人死咗），諗到永遠會冇咗佢嘅真愛嗰陣，佢就覺得好悲痛同埋沮喪，隨後佢仲自殺。朱麗葉醒返之後見到對方嘅屍體，佢亦都好絕望噉結束咗自己嘅生命。

中國元曲，徐再思就寫咗一首有關相思病既詩--《折桂令·春情》：「平生不會相思，纔會相思，便害相思。」

睇埋

• 戀愛強迫症
• 戀愛成癮