睾丸扭曲或稱睾丸扭轉(英文:Testicular torsion)係一種急症,指男性精索扭轉從而切斷向睾丸同埋附睾

成因

位於陰囊裏面嘅每粒睾丸正常時緊貼於陰囊,各由一抽精索連繫住,精索入面有動脈靜脈淋巴管。當抽精索扭轉咗,睾丸靜脈英文Testicular vein啲血冇辦法流出嚟、睾丸動脈英文Testicular artery啲血又流唔到入粒睾丸,睾丸嘅淋巴同血液循環就受阻。

睾丸扭曲可以分為鞘膜外型同埋鞘膜內型。鞘膜外型多數發生喺男仔,而鞘膜內型較常見於後生仔成年人;25歲以下嘅男人發生率大約1/4000,而12到18歲發育期嘅𡃁仔最容易發生,因為睾丸發育得太快導致位置改變,又或者粒睾丸喺睾丸鞘膜英文Tunica vaginalis裏頭仲未固定而扭轉。[1]睾丸扭曲甚至會發生喺未出世BB仔身上,但好鬼罕見,每十萬名男嬰約有六個案例。[2]

風險因素

約40%嘅睾丸扭曲發生喺瞓覺當中或者啱啱瞓醒,可能係瞓覺時迷走神經興奮,令精索嘅提睾肌英文Cremaster muscle收縮增加;有啲係睡姿不當令兩條經常擠壓睾丸,導致粒睾丸被逼改變位置,另外劇烈體力勞動、寒冷、頻繁性交都可能誘發睾丸扭曲。[1]

九成睾丸扭曲個案都屬於精索過長;睾丸橫置、睾丸癌中文睾丸癌同埋睾丸未降都會增加發病機會,但由睾丸受傷或受撞擊導致扭轉嘅機會則只有4%至8%。睾丸扭曲多數只係扭一邊睾丸,兩抽精索同時扭轉嘅個案只佔一至兩成。[3]

症狀

睾丸扭曲並冇先兆,當精索扭轉就會扯高粒睾丸,唔再處於正常位置,又正常為垂直嘅睾丸扭曲後多會變打橫,輕輕掂下就劇;同時睾丸會腫同出血,引起陰囊突發極痛,或者由隱痛加劇並轉為持續疼痛,有啲人更會有噁心或嘔吐感覺。

診斷及治療

當粒睾丸升高或者扭橫,有經驗嘅醫生靠觸診就知道,但亦有機會係同發睾丸炎英文Orchitis相似。要有效區分係睾丸扭曲定發炎,可以經超聲波檢查嘅彩色多普勒掃描,顯示血流情况。睾丸扭曲血液供應大幅減少;睾丸發炎就會血流增加。

當睾丸扭曲後,睾丸附睾突然缺血,短時間內就會壞死並須切除睾丸,所以要喺病發後六個鐘頭內做手術復原、回復血液供應,就約有八至九成機率救返粒睾丸;一旦超過咗十個鐘,救返機率唔夠一成,而超過一日,睾丸壞死,必須切除。[4]

手術除咗為扭曲嘅睾丸復位,另外無事嗰粒都會做埋睾丸固定術英文Orchiopexy,為兩粒睾丸一齊增加穩定性,降低日後復發扭曲機率。

睇埋

參攷

  1. 1.0 1.1 連峻 (2016年6月8號). "扭扭蛋". am730. 喺2020年11月17號搵到.
  2. "英婦產檢 揭胎兒睾丸扭曲". 東方日報. 2018年2月12號. 喺2020年11月17號搵到.
  3. "精索扭轉可致睾丸壞死". 東方日報. 2015年5月22號. 喺2020年11月17號搵到.
  4. 陳雅君 (2015年9月21號). "搶救扭蛋黃金6小時睾丸扭轉快速缺血壞死". 明報. 喺2020年11月11號搵到.