矩陣式管理

矩陣式管理（matrix management）係一種源於 1950 年代、喺 1970 年代開始盛行嘅管理方式。一個採取矩陣式管理嘅組織會好似打前嗰啲噉，按功能－研發、市場研究、人力資源同財政呀噉－分做若干個唔同嘅部門，同時個組織做緊嘅嘢會分做若干個項目（project），每個項目都可以跨越幾個部門，由某一個老細帶領，於是個組織嘅每一個個體都會有一個主要老細，但同時又會為第啲老細搞項目，唔係好似金字塔式管理噉，每個個體淨係屬一個部門，淨係使向一個老細報告。畫做圖嘅話，矩陣式管理會出好似下圖嗰個矩陣，橫行表示部門，直行表示產品，每一個項目都可以由多個部門嗰度搵人幫手做。矩陣式管理俾人指係能夠結合「功能性分部門」有嘅效率同埋「一人同時做幾樣功能」有嘅彈性，喺廿一世紀初嘅管理界開始受到重視。

舉個簡單例子說明，想像一間科技公司，佢哋嘅員工分做研發同市場研究等嘅部門；家陣佢哋搞一個項目想研發一樣新產品，呢個項目唔淨只涉及研發部嘅工程師，仲會招埋市場研究部門嘅人嚟幫手，當中啲工程師同市場研究員會交流知識，令到雙方識得點樣將市場研究得出嘅結果－例如係有關消費者嘅品味嘅資訊－結合落去產品設計嗰度，從而達致更加有效嘅研發