石頭城

  想搵第二個意思嘅話，請睇石頭城 (搞清楚)。

中國全國重點文保單位 南京城牆 石頭城遺蹟
所在	江蘇南京鼓樓區
類	古建築
時代	東漢
號	3-59
登錄	1988年

石頭城（粵拼：sek6 tau4 sing4），係喺中華人民共和國江蘇省南京鼓樓區清涼門北面嘅古城，喺清涼山上，南京別名「石頭城」「石城」就係來源自佢。東漢建安十七年（212年），孫權喺度築城，1988年1月13號，國務院指定佢做全國重點文物保護單位。

佢係南京少數同《三國志》有關嘅遺蹟之一。而家殘留一部分嘅城牆，個城牆嘅樣望落似鬼嘅面，所以別稱又叫鬼臉城（gwai2 lim5 sing4）。

從石頭城開始，沿住城牆向北，係六朝時嘅城牆，向南行就係清涼門。喺石頭城嘅城牆上行，會入到國防園。

史

周顯王三十六年，楚威王滅越國，喺清涼山整咗座城邑，亦即金陵邑。當時金陵邑下面就係長江，地勢險要。212年，孫權喺金陵邑嘅基礎上起成石頭城。城牆用泥砌成，全長「七里一百步」，東面有兩個門，南面有一個門，西面臨江，無門。當時石頭城係長江要塞，控制住秦淮河入江河口，稱爲控淮制江，係六朝時建康城嘅西大門。所以石頭城係六朝諸多事件嘅必爭之地，比如蘇峻之亂。

隋朝滅陳，毀滅咗建康城，就喺石頭城建置蔣州，唐初喺石頭城設揚州大都督府，所以係隋朝同唐初，石頭城係南京一帶嘅中心。日後長江河道西移，石頭城嘅要塞地位失落，到唐中期就已經廢棄。五代十國時，楊吳重建金陵城，但冇重修石頭城，直到明朝經營南京城時，石頭城納入南京城牆西面嘅一部分。

遺蹟

石頭城廢棄後，清涼山上嘅鬼臉城就係石頭城遺物。佢係明朝城牆嘅一座城頭，因爲塊紅巖似鬼面，下面又有眼水塘，於是構成金陵四十八景中嘅「鬼臉照鏡」。1982年做咗江蘇嘅省文物，1988年作爲南京城牆成爲中國嘅國家重點文物。

2009年，南京大學同南京市博物館喺清涼山考古，到2011年發現石頭城大規模砌城牆嘅遺蹟，基本確定舊時嘅石頭城係喺而家清涼山、國防園、菠蘿山、紅土山一帶，週長三公里，同史料吻合。