開主選單

座標: 32°3′11.2″N 118°45′2.2″E / 32.053111°N 118.750611°E / 32.053111; 118.750611

中國全國重點文保單位
南京城牆
石頭城遺蹟
Nanjing ShitouCheng.jpg
所在
古建築
時代東漢
3-59
登錄1988年

石頭城粵拼sek6 tau4 sing4),係喺中華人民共和國江蘇省南京鼓樓區清涼門北面嘅古城,喺清涼山上,南京別名「石頭城」「石城」就係來源自佢。東漢建安十七年(212年),孫權喺度築城,1988年1月13號,國務院指定佢做全國重點文物保護單位

佢係南京少數同《三國志》有關嘅遺蹟之一。而家殘留一部分嘅城牆,個城牆嘅望落似嘅面,所以別稱又叫鬼臉城gwai2 lim5 sing4)。

從石頭城開始,沿住城牆向北,係六朝時嘅城牆,向南行就係清涼門。喺石頭城嘅城牆上行,會入到國防園

周顯王三十六年,楚威王滅越國,喺清涼山整咗座城邑,亦即金陵邑。當時金陵邑下面就係長江,地勢險要。212年,孫權喺金陵邑嘅基礎上起成石頭城[1]。城牆用泥砌成,全長「七里一百步」,東面有兩個門,南面有一個門,西面臨江,無門。當時石頭城係長江要塞,控制住秦淮河入江河口,稱爲控淮制江,係六朝時建康城嘅西大門。所以石頭城係六朝諸多事件嘅必爭之地,比如蘇峻之亂[2][3]

隋朝滅陳,毀滅咗建康城,就喺石頭城建置蔣州,唐初喺石頭城設揚州大都督府,所以係隋朝同唐初,石頭城係南京一帶嘅中心。日後長江河道西移,石頭城嘅要塞地位失落,到唐中期就已經廢棄。五代十國時,楊吳重建金陵城,但冇重修石頭城,直到明朝經營南京城時,石頭城納入南京城牆西面嘅一部分。

遺蹟

石頭城廢棄後,清涼山上嘅鬼臉城就係石頭城遺物。佢係明朝城牆嘅一座城頭,因爲塊紅巖似鬼面,下面又有眼水塘,於是構成金陵四十八景中嘅「鬼臉照鏡」。1982年做咗江蘇嘅省文物,1988年作爲南京城牆成爲中國嘅國家重點文物。

2009年,南京大學南京市博物館喺清涼山考古,到2011年發現石頭城大規模砌城牆嘅遺蹟,基本確定舊時嘅石頭城係喺而家清涼山、國防園、菠蘿山、紅土山一帶,週長三公里,同史料吻合[4]

  1. 《太平御覽》156卷引《吳錄》話:「劉備曾使諸葛亮至京,因睹秣陵山阜,嘆曰:鐘山龍盤,石頭虎踞,此帝王之宅。」
  2. 《晉書·帝紀七》:「成皇帝諱衍,字世根,明帝長子也。……咸和元年春……三年……五月乙未,峻逼遷天子於石頭,帝哀泣升車,宮中慟哭。峻以倉屋爲宮,遣管商、張瑾、弘徽寇晉陵,韓晃寇義興。吳興太守虞潭與庚冰、王舒等起義兵於三吳。丙午,征西大將軍陶侃、平南將軍溫嶠、護軍將軍庾亮、平北將軍魏該舟軍四萬,次於蔡洲。」
  3. 《晉書·志十八》:「明帝太寧初,童謠曰:「惻惻力力,放馬山側。大馬死,小馬餓。高山崩,石自破。」及明帝崩,成帝幼,為蘇峻所逼,遷於石頭,御膳不足,此「大馬死,小馬餓」也。高山,峻也,又言峻尋死。石,峻弟蘇石也。峻死後,石據石頭,尋為諸公所破,復是崩山石破之應也。」
  4. "賀雲翱:石頭城遺址發現大規模磚砌城牆 確定四至範圍". 南京日報. 2012年3月15號.