神經系統發育

神經系統發育係指一隻動物嘅神經系統隨隻動物成長而有嘅變化。

腦發育

睇埋：神經生成

喺腦嘅發育過程當中，個腦唔係一味單純噉變大，而係會經過一大柞複雜嘅變形：個腦喺發育途中會多次改變形狀，最早期當個人仲係一個胚胎嗰陣，佢個腦只不過係一粒喺神經索（nerve cord；脊椎嘅雛形）最前嗰段仔漲咗少少嘅結構，而神經細胞會由一個包含幹細胞嘅特別部位嗰度生出嚟，穿過啲組織移到去佢哋最終嘅位置。當一粒神經細胞去到佢個指定位置嗰陣，佢嘅軸突會開始伸長、分叉、穿過成個腦、直到佢嘅尾段到達佢嘅目的地，並且形成一個突觸連結網絡。成個神經系統入面，有好多個部分裏面初頭都會形成好多神經細胞同突觸，而呢啲神經細胞同突觸當中冇用嘅最後會消失死亡。除咗呢啲少數例外，一個人喺出咗世之後就唔會再生新嘅神經細胞。

脊椎動物嘅神經系統發育喺早期階段都好相似：隨住胚胎由好似波噉嘅一團細胞變成蠕蟲形嘅結構，外胚層（ectoderm）當中喺背脊正中間嘅一條窄帶會分化做一塊神經板（neural plate）－而呢塊嘢就係神經系統嘅前身；神經板會向內凹陷，形成一條神經溝（neural groove），然後神經溝嘅邊綠融合形成神經管（neural tube）－一條充滿液體嘅中空細胞管；喺呢條細胞管最前截會出現三粒漲大嘅物體，呢三嚿嘢遲吓就會變成前腦、中腦同菱腦，菱腦又會再分裂做後腦同末腦（myelencephalon；包括延腦等嘅結構）兩截。以上呢啲區域每一個入面都會有神經細胞同膠質細胞生出嚟，而呢啲新生細胞仲有可能喺區域之間遷移。

一旦一粒神經細胞到咗佢嘅目的地，佢就會向周圍伸好多樹突同一條軸突出嚟。因為軸突通常會延伸到去離細胞體好遠嘅地方，而且要去到特定嘅目的地，所以佢生嘅方式零舍複雜：生緊嘅軸突嘅頭段會有一細嚿嘅生長錐，生長椎上面佈滿咗化學受體，呢啲受體會感應周圍嘅環境，令到生長錐受某啲嘢吸引或者排斥－於是條軸突就會沿住一啲特定嘅路線伸到去佢嘅目的地，再形成突觸。引導軸突嘅過程係由上千個基因嚟一齊控制嘅。但係最後形成嘅突觸網絡係點嘅樣淨係局部由基因話事嘅－成長環境都會影響突觸網絡嘅最終形態。

一個人腦由一個禮拜大到 10 歲大嘅變化圖

生多再剪

睇埋：突觸修剪

喺個腦嘅好多個部份，啲軸突初頭會「生得多得滯」（overgrow），然後先根據佢哋嘅神經活動嚟「修剪」，睇吓邊啲可以唔要。例如係大人喺由對眼去中腦嗰段神經結構嗰度，有好精確嘅一對一對應－視網膜上面每一忽都會喺中腦層嗰度有一個對應嘅點。噉查實有段故：喺胚胎發育嘅第一個階段，由視網膜伸過嚟嘅每一條軸突都會受化學訊號引到去中腦嗰一頭，跟手每條都會分叉得好犀利，再各自同好多粒中腦神經細胞接觸；但喺個細路出世之前，塊視網膜會有啲特別嘅機制，令到佢係噉由是但一點嗰度產生活動，並且將呢啲活動傳過成塊視網膜，呢啲活動會向中腦傳達訊號，話俾佢知視網絡啲神經細胞係點樣排嘅；跟住落嚟，中腦就會做嘢，將排得唔啱嗰啲突觸弱化消失。呢種過程會令到個中腦同視網膜之間嘅神經細胞有愈嚟愈高嘅對應－最後達致完美。

喺個腦嘅第啲部份都會發生類似嘅嘢：喺胚胎發育初期，會有一大柞突觸生得好勁，兼且係亂咁生，令到出現咗一大片突觸矩陣，但打後呢片矩陣會由神經活動同其他因素負責「修剪」。喺某啲個案－好似係頭先提到嘅視網膜至中腦連結－入面，呢啲修剪淨係會喺發育緊嘅腦入面產生，而且似乎純粹係為咗引導發育而存在嘅。

睇埋

• 學習