神經經濟學

神經經濟學san4 ging1 ging1 zai3 hok6（英文：neuroeconomics）係一個跨學科領域，嘗試用神經科學嘅方法嚟了解人類點樣做經濟決策，例如係用腦電圖等嘅神經成像方法監察受試者喺做經濟決策嗰陣時嘅腦有乜活動，並且研究腦活動對經濟決策有乜嘢影響，以及思考呢啲研究嘅發現對經濟模型等課題有乜嘢啟示。

功能性磁振造影（fMRI）所造出嘅人腦影像；紅色嗰幾笪表示活動零舍強。

犒賞系統

内文：犒賞系統

睇埋：效益

例如神經科學當中犒賞系統（reward system）嘅概念就引起咗行為經濟學界嘅關注。

犒賞系統包括咗一柞緊密相連嘅神經系統結構，呢啲結構會一齊負責控制一隻動物（包括人類）追求心理犒賞－「心理犒賞」簡單講就係令隻動物有快感嘅嘢，包括嘢食同水呢啲生存必需要嘅物品、同伴之間嘅情感聯繫、以至（對人類嚟講）打機等嘅娛樂活動呀噉。犒賞系統涉及嗰柞結構會對犒賞有反應，一見到犒賞出現就變得活躍。

另一方面，經濟學上不嬲都有喺度諗「人喺做決策嗰陣，係點樣判斷唔同選擇嘅效益（簡單講就係有幾鍾意嗰個選擇嘅結果）嘅呢？」等嘅問題，而犒賞系統就俾人覺得同效益好有啦掕－好多研究者認為，「一個選擇嘅主觀效益」基本上可以想像成「犒賞系統嘅活躍程度」或者相關嘅變數，即係話根據呢套睇法，犒賞系統嘅概念俾經濟學家有方法可以客觀噉量度「效益」呢一個本來覺得難以客觀衡量嘅變數。

睇埋

• 行為經濟學