私奔
私奔，指相愛嘅未成年男女未經父母之命同媒妁之言就私定終身兼走路，去好遠嘅地方結成夫妻。
嚮好多愛情小說文藝故事入便，私奔係浪漫嘅、愛到忘我嘅行為，係反封建、反極權、反建制嘅偉大行為。好似德斯汀荷夫曼主演嘅美國電影《畢業生》，佢去搞橫人哋個婚禮，帶走羅便臣太太（Mrs Robinson）個女Katharine Ross，一齊私奔。
浪漫嘅私奔故事經常係得上集。跟著嘅下集係一個寫實故事，社會問題包括失學、失業、童工、早婚、未婚產子、老公再走路、單親媽媽，甚至少女畀人賣落火坑、男盜女娼都有可能。
若果男女經已成年、出身社會做事、有經濟能力，就算冇問過父母同意，不辭而別，同打令搬出去住，都唔算叫做私奔。不過，喺中國古時，男婚女嫁係要有「父母之命，媒妁之言」，未經父母同意就出走，就算成咗年都叫做私奔，男方甚至會判拐帶良家婦女。