租

租（又叫出租、租賃）係一種商業行為，即係一方用一啲嘢（多數係錢）換嚟暫時使用另一方擁有嘅嘢。租嘢嚟用嘅一方，叫「承租人」。 畀出嚟嘅錢叫「租」或者「租金」。租賃時都會白紙黑字寫清楚，呢啲憑據就叫做「租約」、「租賃協議」（tenancy agreement）或者「租契」（lease）。租約協議嘅內容就係寫啲「租務條款」。

租舖廣告

租單車、租 canoe 嘅舖頭

架生租賃

租約

早喺公元前 1754 年，《漢摩拉比法典》（Code of Hammurabi）之中就可以搵到一啲，同地主同承租人關係嘅法律規定。普通法對地主 - 承租人嘅規定，喺中世紀嘅英國發展出嚟，而呢套法律保留咗，好多同封建社會秩序，同農業經濟，有關嘅古老術語同原則。好多唔同司法管轄權嘅地方，租土地物業喺法例上，寫得好清楚，香港嚟講，就係用普通法嘅寫法。租約係「一份具有約束力嘅法律文件，對業主同租客所承諾嘅權利同責任具有重要影響。」

租嘅嘢

可以租嘅嘢種類繁多：成日見嘅有：租屋、租樓、租寫字樓、租舖頭、租單車、租車、租船、租傢俬、租架生、租迷你倉、租影碟、租衫……等等。

點解要租

有好多可能嘅原因令到去租而唔係買：

• 好多司法管轄區（包括印度、西班牙、澳洲、英國同美國），公司租樓嘅租金可以扣稅，買樓就唔得。
• 唔夠錢。冇錢買樓，只可以租樓。
• 考慮少啲，唔使諗件嘢嘅維修、過時。
• 責任少啲。例如租樓唔使自己修理，問題業主搞掂。
• 只有暫時需要。好似一啲又貴又阻地方嘅架撐、擺酒新娘用嘅金器。
• 可能已經有，但係帶唔到要用嘅地方用。旅行租車為例。
• 租平過買。租戲睇平過係去戲院睇。
• 夠環保，特別係一啲貴，又少用嘅嘢，可以將佢哋用到盡。

特色租賃

租絕多數只涉及物，而 boss 搵人幫佢返工做嘢（即喺一段時間使用呢個人），喺廣東話嘅語境裏頭，唔會叫做「租」而係叫「請人」或「顧用」，而俾請人嘅角道嚟講，叫「出賣勞力」、「打工」。喺日本，人都可以「出租」，中年男人將自己，段鐘計，租出去陪人，叫「出租大叔」。

先租後買

先租後買（租到買）一般係一開始用租嘅形式去畀錢，過咗協議時間之後，畀埋尾數就擁有嗰件嘅產品。至於細節好似手續費，扣數、附加費、唔買點計噉，就根據合約唔同嘅產品而定。好處係租嘅時間諗清楚試清楚，產品放喺每日真實處境之下使用，唔會買之後唔鍾意唔啱用。壞處係件嘢嘅價錢比就咁買高啲，過期唔交租有罰款等。

至少喺香港，分期付款（hire purchase）唔會睇成係租賃嘅一種。而係一種畀錢嘅方式，而其實係借錢買嘢。

睇埋

• 借
• 按金