第1屆星加坡總統選舉

第1屆星加坡總統選舉喺1993年8月28號舉行，呢次選舉係星加坡第一次舉行嘅總統選舉，亦都係唐人世界入面第一次總統直選。

前副總理王鼎昌喺選舉入面攞到58.69%嘅選票贏出選舉。

背景

1991年1月，修改咗《星加坡共和國憲法》^[1]，規定總統要由直選選出。直選總統出現顯示出星加坡憲法同政治嘅大改革。總統擁有對國家儲備金同公務員嘅否決權，有權審查內部安全法令^[1]同維護宗教和諧法令^[1]嘅執行，同埋可以調查貪污案。

喺改星加坡憲法之前嘅過渡條文^[2]之下，前任總統黃金輝就好似直選選出嚟做總統一樣，要履行直選總統嘅職權同任務，直到王鼎昌接手為止。

候選人都一定要經選舉委員會審查過關攞到合格證書先會做到候選人。

報名審查之前要畀坡紙萬八蚊按金，同埋交埋提名申請表先會搞掂報名手續。而呢屆提名日喺1993年8月18號。

王鼎昌為咗參選，一早就辭咗副總理嘅職務。而當時嘅總理吳作棟同埋當時嘅國務資政李光耀都係王鼎昌嘅支持者。

但係，一啲內閣部長同埋人民行動黨黨員就係蔡錦耀嘅支持者，當中包括財政部長胡賜道、前貿易部長同華僑銀行行政總裁陳慶炎。

工人黨黨員約舒亞·本傑明·惹耶勒南^[3]同陳樹芬亦申請提名自己做總統候選人，但係佢哋審查肥佬，攞唔到合格證書。

蔡錦耀本來就唔想參選，係政府夾硬氹掂佢出嚟參選，咁樣做先有競爭，選民先可以係兩個候選人入面揀其中一個。

十日嘅宣傳期應該係周圍都貼滿政綱之類嘅「君子之戰」，但係蔡錦耀偏偏用盡「千方百計」叫佢嘅支持者絕對唔好投票畀佢。而佢喺電視出現嘅次數就只有兩次（有次重甚至避免講到關於自己嘅諗法），甚至喺投票嗰日話王鼎昌先係更好嘅總統人選。但係即使係咁，蔡錦耀都攞到41.3%嘅選票，表現就非常之好^[4]。