第3屆阿富汗總統選舉

第3屆阿富汗總統選舉響2014年4月5號同6月14號舉行。

第3屆阿富汗總統選舉
阿富汗選舉政治專題
‹ 2009 •  • 2019 ›
2014年4月5號 第二輪：2014年6月14號
選舉制度				兩輪投票制
選舉統計
第一輪總投票數						7,018,049
第二輪總投票數						？
			加尼
			第一輪投票數				2,084,547
			第二輪投票數				3,935,567 ▲88.8%
									31.56%
									55.27%
			阿卜杜拉阿卜杜拉－阿富汗民族陣線
			第一輪投票數				2,972,141
			第二輪投票數				3,185,018 ▲7.2%
									45.00%
									44.73%
阿富汗總統
選前 卡爾扎伊 獨立人士						選後 加尼 獨立人士

背景

呢次選舉有一千二百萬名選民，為咗確保選舉公正、防止舞弊，獨立選委會響外國買咗有條碼嘅選票，同時響意大利訂咗一批一個禮拜都洗唔甩嘅油墨，以便響選民隻手到做記號，防止有人重複投票。

根據憲法，已連任兩屆嘅時任總統卡爾扎伊唔得參加，所以呢次係阿富汗響2001年推翻塔利班政權之後，首次以民主方式移交政權，加上以美軍為首嘅國際安全部隊即將撤離，選舉將會影響阿富汗內政、外交發展，備受國際高度關注。

選委會又話，全國七千幾個票站，有近一成因暴力威脅開唔到，唔少都係塔利班最活躍嘅東部選區。而塔利班又響選舉之前講過會以暴力抵制選舉，票站同選民都係襲擊嘅目標。佢哋自3月以嚟已經發動多宗襲擊，當局派出超過三十五萬士兵同警察維持治安。

過程

投票響當地時間朝早七點開始，首都喀布爾唔少選民無懼塔利班同大雨，一早到票站排隊投票，迎接阿富汗新嘅歷史起點。

候選人

今屆選舉一共有八個候選人，當中以最大反對黨民族陣線領導人阿卜杜拉阿卜杜拉、前財長加尼、前外長拉蘇爾嘅呼聲最高。

民意調查

輿論預測，阿卜杜拉阿卜杜拉有三成支持率，領先其他對手。

後續

6月舉行嘅第二輪投票，有份參選嘅阿卜杜拉阿卜杜拉話選舉舞弊，拒絕承認結果。最後，經美國斡旋，加尼同阿卜杜拉阿卜杜拉達成分享權力協議，同意由加尼出任總統，阿卜杜拉阿卜杜拉出任政府長官。

9月29號，宣誓儀式響首都喀布爾嘅總統府舉行，多國代表同卸任嘅卡爾扎伊亦有出席。加尼同兩個副總統同做政府長官嘅阿卜杜拉阿卜杜拉一齊宣誓。

分析

選前

預計冇單一候選人可以攞到過半數選票，選舉好大機會要進入第二輪投票，由攞到最多票數嘅兩位候選人再決高下。

外界擔心，可能要到10月先能夠選出新總統。如果再有咩差池，可能會影響同美國簽署雙邊安全協議。有關協議關乎北約部隊今年撤軍之後，美國駐兵人數同權利，卡爾扎伊因為同美國翻面，一直拒絕簽呢份協議。所有總統候選人承諾，一旦贏出，會同美國簽署協議，確保2015年重有成萬美軍駐守，幫手穩定局勢。

選後

預料加尼上任之後，治安仍然係一個難題，響就職禮期間，總統府同機場之間嘅一段主要道路，先後發生兩次路邊炸彈爆炸，導致十幾人死傷。