米海一世
米海一世（羅馬尼亞文：Mihai I，1921年10月25號—2017年12月5號），又譯米高一世、米哈伊一世，係羅馬尼亞王國最後一任國王，分別響1927年至1930年、1940年至1947年在位，一共在位大概十年。
| 米海一世 | |
|---|---|
 | |
| Template:羅馬尼亞王國旗資料國王 | |
| 第一次在位 | 1927年7月20號ー1930年6月8號 |
| 加冕 | 1927年7月20號 |
| 前任 | 費迪南一世 |
| 繼任 | 卡路二世 |
| 第二次在位 | 1940年9月6號ー1947年12月30號 |
| 加冕 | 1940年9月6號 |
| 前任 | 卡路二世 |
| 羅馬尼亞王朝家族首領 | |
| 在位 | 1947年12月30號ー2017年12月5號 |
| 繼任 | 瑪格麗塔 |
| 配偶 | 波旁-帕爾馬嘅安娜（1948年結婚；2016年老婆過身） |
子嗣 | |
| 家族 | 荷亨佐倫王朝（1921ー2011） 羅馬尼亞王室（2011ー） |
| 父王 | 卡路二世 |
| 母后 | 希臘伊莉娜 |
| 出世 | 1921年10月25號 |
| 出世地 | Template:Kingdom of Romania旗資料錫納亞佩雷斯城堡 |
| 死 | 2017年12月5號（96歲） |
| 死地 |  瑞士歐博訥[1] |
| 陵墓 |  羅馬尼亞阿爾傑什河畔庫爾泰亞 |
| 簽章 |  |
| 宗教 | 羅馬尼亞正教會 |
早年
編輯.jpg)
米海王子1921年10月25號響羅馬尼亞王國錫納亞附近嘅佩雷斯城堡出世，老豆係時任王儲卡羅爾，阿媽係希臘公主伊莉娜，阿爺係時任羅馬尼亞國王費迪南一世，阿公就係康士坦丁一世。
第一次統治
編輯老豆卡羅爾本身並唔中意伊莉娜，所以佢響1925年同二奶Magda Lupescu私奔，兼且放棄王位繼承權，米海王子升為王儲。1927年7月20號，阿爺費迪南一世過身，當時只有5歲嘅米海登基做國王，成為當時歐洲最後生嘅國王。由於佢太細個並冇處理政事嘅能力，所以由阿叔尼古拉王子、大主教米龍同大法官Gheorghe Buzdugan攝政。直至1930年6月，由於當時羅馬尼亞面臨大蕭條，啲政客要求卡羅爾返羅馬尼亞，於是發動政變令米海退位做王儲，卡羅爾返嚟做國王。
第二次統治
編輯
1940年9月，卡羅爾二世因為羅馬尼亞畀人搶走好多領土而畀新上任、親法西斯嘅軍人總理伊昂·安東尼斯古迫住落台，年僅18歲嘅米海被迫再次登基。雖然佢擁有一切國王嘅權利，亦係軍隊名義上嘅最高領導人，但佢只係安東內斯庫嘅傀儡。同年11月，羅馬尼亞加入軸心國。米海先後兩次同阿道夫·希特拉食飯，亦見過意大利總理貝尼托·墨索里尼[5]。
1944年，二戰局勢已經開始對軸心國不利，但當時由安東尼斯古控制嘅羅馬尼亞依然冇退出嘅意思。蘇聯已經兵臨城下，仲就快打到首都。米海被迫發動政變，下令拉咗安東尼斯古，任命新總理彼得魯·格羅查。羅馬尼亞隨即宣佈加入同盟國，脫離軸心國，同蘇聯簽停戰協議，羅馬尼亞承認自己係畀蘇聯「打低」，蘇聯於是入城控制羅馬尼亞。之後羅馬尼亞積極同蘇聯、美國等盟軍合作。1945年二戰玩完後因為呢單嘢而獲得勝利勳章。
響二戰玩完後，逼於政治壓力，米海並冇親政嘅機會，當時政府由總理彼得魯·格羅查控制。好快，全國就畀羅馬尼亞共產黨控制，佢再次做傀儡。響1945年去到1946年，米海試過用唔簽由格羅查提交嘅法令嚟反抗格羅查、要求格羅查辭職走人等等，但呢啲招數成效唔大，佢最終放棄反抗。
1947年11月，佢到英國參加表哥菲臘王子同英國時任王儲伊利沙伯嘅婚禮。
1947年12月30號，原本仲籌備緊慶祝新年嘅米海一世畀格羅查帶到由共產黨控制嘅伊利沙伯城堡，發現城堡外面俾共產黨軍隊包圍。國王畀一人持槍要脅、加上等唔到忠於佢嘅羅馬尼亞軍支援下，被迫簽署一份由共產黨預先準備好嘅退位文書。跟住共產黨政府就宣佈廢除君主立憲制、成立羅馬尼亞社會主義共和國。
米海一世對於自己被迫退位嘅細節嘅講法隨住時間而有所變化。響50年代至70年代，佢話見到響宮殿周圍有好多人攞槍，又話格羅查試圖以某種方式去補償佢嘅退位，指出如果佢唔應承，唔單些佢條命保唔住，仲可能令到好多人被共產黨政權拉、引發內戰。不過，由90年代開始，佢就話係格羅查要脅要下令殺死一千名學生。
跟據英國外交、聯邦及發展事務部響2005年嘅解密文件，當時國王響羅馬尼亞嘅資產係50萬瑞士法郎。而跟據格羅查同蘇聯領導人史太林之間嘅秘密談話，話米海響退位前無耐得到共產黨畀佢嘅50萬瑞士法郎。米海一世並唔承認，話共產黨唔畀自己帶走響羅馬尼亞嘅資產，除咗四架車之外。
流亡
編輯米海被迫流亡。響1948年3月，米海話呢次退位係非法，認為自己仲係羅馬尼亞合法嘅國王。佢先後流亡意大利佛羅倫斯、瑞士洛桑、英國漢普郡，最後響1956年同老婆定居響瑞士韋爾蘇瓦。佢先後做過農民、飛行員、生意人同證券經紀人。
自從1940年老豆卡羅爾被推翻後，米海就再冇同佢見面。佢認為同老豆見面冇意義，亦認為老豆多次響公開場合羞辱佢阿媽，最後就連卡羅爾嘅葬禮都冇出席。
回國
編輯
1990年，佢用丹麥護照搭飛機到布加勒斯特亨利·科安德國際機場，係佢43年嚟第一次返鄉下。1992年，響羅馬尼亞政府嘅批準下，到酒店發表演講。1997年，佢重新獲得羅馬尼亞公民身分。
米海一世響晚年並唔尋求恢復王位，既唔鼓勵又唔反對恢復君主制嘅活動。佢響1990年話：「如果人民想我返嚟，我當然會返。羅馬尼亞人要求受咗好多苦，佢哋有權去決定佢地嘅未來。」2011年10月25號，響佢90歲生日嗰陣，佢響羅馬尼亞議會發表講話：「由我做國王開始已經過去咗84年，我可以一啲都唔猶豫咁話畀所有羅馬尼亞人聽，除咗自由同民主，我們最需要獲得嘅係身份認同同埋民族尊嚴。呢啲亦係在座各位位羅馬尼亞精英要擔負嘅重任。」
根據響2007年嘅民意調查，只有14%嘅人想羅馬尼亞恢復君主制。不過咁，米海一世嘅聲望幾高，尤其響晚年嗰陣。響2013年嘅一個民意調查，45%嘅人對米海國王有住好嘅睇法，對佢有壞睇法嘅只有6.5%。
佢亦發揮出佢嘅外交作用。響1997年至2002年期間，佢訪問歐洲好多國家，說服佢哋畀羅馬尼亞加入北約同歐盟。
2011年，佢宣佈放棄一切對「荷亨佐倫親王」嘅要求，退出荷亨佐倫家族。
2016年，皇家委員會宣佈國王退休，事務由大女瑪格麗塔公主處理。佢畀人診斷出有慢性白血病同埋鱗狀細胞癌。
2017年12月5號，米海一世響細女嘅倍伴下過身，終年96歲。佢嘅遺體由羅馬尼亞政府以軍機運返國家，以國葬儀式落葬。佢嘅國葬儀式係羅馬尼亞最大嘅葬禮之一，好多其他國家嘅元首亦有出席。羅馬尼亞總統克勞斯·約翰尼斯讚米海一世係「為羅馬尼亞歷史書寫咗一燦爛篇章，值得人民去多謝」[6]。
婚姻
編輯1948年6月10號，米海一世同波旁-帕爾馬王朝嘅安娜響希臘雅典結婚。兩個人係響菲臘王子同英國時任王儲伊利沙伯嘅婚禮上識嘅。由於安娜係天主教徒，而米海係東正教徒，而要獲得天主教會豁免，就要唔係信天主教嘅一方應承將兩個人第日嘅細路成為天主教徒。米海唔應承，因為咁樣會違反羅馬尼亞憲法。結果，佢哋響冇受到天主教會豁免嘅情況下結婚，仲要係照東正教儀式去搞，自然呢次婚姻冇被天主教會承認。後嚟兩公婆響摩納哥聖查理斯羅馬天主教堂照天主教儀式結多次婚，符合返天主教規。兩個人有五個女：
攷
編輯- ↑ Palmer, Ewan (2017-12-05). "King Michael of Romania dead: Last Romanian monarch and cousin of the Queen dies aged 96". International Business Times UK. 喺2017-12-05搵到.
- ↑ Realitatea.NET (2015-09-11). "Regele Mihai la scoala. Cum isi amintea profesorul sau despre el: N-a fost premiantul clasei, dar..." Realitatea.NET (羅馬尼亞文). 喺2022-03-13搵到.
- ↑ "O şcoală pentru un singur copil". www.historia.ro (羅馬尼亞文). 喺2022-03-13搵到.
- ↑ "Ce citeau romanii acum 68 de ani?: ZIUA". web.archive.org. 2008-10-12. 歸檔時間2008-10-12. 喺2022-03-13搵到.
{{cite web}}: CS1 maint: bot: original URL status unknown (link) - ↑ Galán, Lola (2011-12-24). ""Comí con Hitler, era estirado y frío. Mussolini parecía más humano"". El País (西班牙文). ISSN 1134-6582. 喺2022-03-13搵到.
- ↑ Martin, Douglas (2017-12-05). "King Michael of Romania, Who Ousted a Hitler Puppet, Dies at 96". The New York Times (美國英文). ISSN 0362-4331. 喺2022-03-13搵到.