粵商
粵商（粵拼：Jyut6 soeng1），又嗌做廣東商幫，係由廣東本地嘅三大民系組成嘅商人幫，尤其係廣府幫（海外慣稱廣東幫、廣肇幫）[1]。狹義上嚟講「粵商」指粵人商幫，廣義嘅「粵商」就包埋廣東嘅廣府幫，潮州幫，客家幫、同埋其餘廣東各地嘅商幫，以珠三角嘅廣府商幫作為代表。廣東嘅「總商會」龐大，廣州係粵商嘅發源地之一，因為廣州史上係主要嘅沿海停泊商船嘅地方，對海運嚟講亦都好緊要，外國人都一定要經廣州通商，令到珠江三角洲成為咗最緊要嘅經商地理環境，先至可以影響廣東其他地方各方面嘅發展。粵商嘅歷史最早有得追溯到秦朝、漢朝時期（公元前 2 世紀），去到大明、大清時期（15 世紀打後）形成唐人之間嘅一大商幫[2]。近代嘅粵商以廣州十三行最出位。
文化學者話，粵商文化發展咗兩千年，包含嘅內容好豐富。其中喺經商處世嘅過程中形成嘅自身獨具特色嘅和諧精神，主要體現喺四個層面：喺決策上精於籌劃、善於變通；喺經營上務實，追求實效；喺行動上反應敏捷、擅長模仿；喺為人處事上通達融和、爽快重義。「務實通達」、「開放兼容」、「和氣生財」呢啲詞語畀好多人用嚟形容粵商精神。
特色
編輯由於地處南部邊陲、遠離政治中心、喺正港澳隔離，同其他唐人商幫比，粵商最早培育同開放市場，最早接受東南亞嘅產業轉移，令到佢哋喺全國形成咗一種有南越區域色彩風格同有嶺南文化特色嘅企業群體，造就咗“粵商”自身獨特嘅個性。呢啲個性既造就咗現代粵商強大嘅生命力，又帶嚟咗製約自身發展嘅新問題。積極咁嚟講，現代粵商畀學者覺得有四方面嘅優勢[3][4][5]：
- 市場敏感性強：粵商一般都能夠快人一步，發現商業機會喺邊。重要喺別人睇唔准或者猶豫嗰陣，果斷咁做決策。呢個都係大量新興業態同商業領域嘅先進技術最先畀廣東商業企業攞嚟用嘅原因之一。
- 接納同包容性強：粵商對於各種有能力嘅人才同埋新事物普遍都會虛心咁學接受，而且對於企業發展有利嘅批評同埋有能力嘅人才都可以包容接納。呢個都係點解珠三角一啲農民商人雖然自身冇乜文化，但係都可以搞得起大型批發市場、高檔連鎖酒店、同埋商業街。
- 講求實效和穩健：粵商做商業，就係好似搞工廠咁，實實在在，既唔會虛漲聲勢，亦都唔會急於求成。踏踏實實，一步一個腳印咁搞大佢，「賺得到手嘅先係錢」，一般都唔會搞啲冇邊際嘅「宏偉設想」。大多都都唔冒風險，唔做冇把握嘅嘢。「朋友還朋友，生意還生意」，算盤打得準。所有嘅經營，強調嘅係效果，對於形式同場面上嘅嘢，粵商普遍唔講究。當年鄭州亞細亞喺廣州仟村百貨經營嗰時，每朝早用鼓樂隊迎接客人，啲粵商就唔明佢有乜嘢實際意義，完全冇接受到。
- 注重實幹同苦幹：大多數粵商係由細商小販做起嘅，所以就算而家規模做大咗，都重係勤勞苦幹。「伙計休息，老細守舖」一啲都唔奇，「大商場開舖，老細親手抺玻璃」亦都唔出奇。