紅梅谷

紅梅谷（Hung Mui Kuk），亦誤寫紅莓谷，香港一地，亦係一谷，喺沙田東便，近隔田村。以前曾經郊遊勝地，現今畀獅子山隧道公路斬開，深谷亦劃入獅子山郊野公園，地近香港名勝望夫石。

紅梅谷燒烤區門牌

名

紅梅谷之名，有說係谷內種得多水楊梅，紅色，因而得名。

地理

紅梅谷近隔田村，喺村西南處，沙田火車站行要四十分鐘。地方闊落，有四、五畝，有廣場容納百人玩同燒烤，故此舊日大受歡迎。紅梅谷有涌水上自谷流入隔田村。不過今日紅梅谷郊遊，係指谷嘅上啲部份，嗰處係獅子山郊野公園，有燒烤地。由於紅梅谷畀獅子山隧道公路斬開，要經谷無幾遠嘅紅梅谷路上山。原郊遊處，後尾已起咗啲屋。

史

一九六七年，計劃地下鐵路沙田綫時，曾建議起紅梅谷站。站並唔喺紅梅谷，而係紅梅谷涌水出谷嘅下游，隔田村公廟附近。站以谷命名，可見當年紅梅谷名氣之盛。紅梅谷當時亦打算起屋邨，不過最尾其無實行。