紐芬蘭與拉布拉多

  「紐芬蘭」跳轉到呢度。想搵島，請睇「紐芬蘭島」。

紐芬蘭及拉布拉多（英文： Newfoundland and Labrador；法文：Terre-Neuve-et-Labrador），又譯紐芬蘭與拉布拉多，係加拿大嘅一個省級政區，首府位於聖莊斯。

紐芬蘭與拉布拉多

Newfoundland and Labrador／ Terre-Neuve-et-Labrador

省訓: Quaerite prime regnum Dei
省長	Andrew Furey
省督	Joan Marie J. Aylward
省城	聖莊斯（St. John's）
大埠	聖莊斯
幅員 - 畝數  - 水域比例	(加拿大第-位) - 英畝 - %
居民 - 人數  - 擠逼指數	(加拿大第-位) - 人 - 人/英畝
官府語言	英文
新式（郵政）簡寫	NL
傳統英文簡寫	Nfld.
傳統法文簡寫	T.-N.-L.
官府電腦網	www.gov.nl.ca

呢個省入面有個因紐特人嘅自治區，叫努那兹阿活。

歷史

早喺9000年前，已經有人類定居喺紐芬蘭，包括喺紐芬蘭島北部同拉布拉多定居嘅因紐特人，同埋喺紐芬蘭島南部同加士披半島定居嘅覓麥人（Miˈkmaq）。

1001年，北歐嘅維京人第一次到達紐芬蘭島，仲建立咗殖民地，但係由於原住民反覆攻擊，最後維京人被迫放棄呢個殖民地。1496年，效力英王亨利七世嘅意大利人佐雲尼·卡博托（Giovanni Caboto）喺紐芬蘭島嘅麗景角（Cape Bonavista）登陸（亦有其他講法，話佢喺今日屬於諾華斯高沙嘅地方登陸），第一次將呢個島命名為「紐芬蘭」，意思係「新發現嘅土地」。

1583年，紐芬蘭成為英國喺北美洲嘅第一個殖民地。1907年，紐芬蘭由殖民地昇格為自治領。一戰之後，紐芬蘭由於參與戰事、世界經濟大蕭條影響漁業、興建橫島鐵路等種種原因而導致債臺高築，喺加拿大唔肯出錢買拉布拉多嘅情況下，1933年，佢被英國單方面將佢降格變返做殖民地。

1948年，英國同加拿大安排咗一個假公投，第一次公投 44% 嘅紐芬蘭人㨂變返自治領（41% 㨂加入加拿大），但係話票數唔夠，第二次公投 52% 嘅紐芬蘭人揀加入加拿大，就話有好強嘅民意基礎，但係其實兩次公投㨂變返自治領同㨂加入加拿大嘅票數差距都一樣係大約 6000 票。1949年，英國 根據第二次公投結果將紐芬蘭併入加拿大。

紐芬蘭同魁北克之間一直就拉布拉多嘅歸屬而爭論不休。1927年，英國方面宣布拉布拉多屬於當時嘅紐芬蘭自治領。1964年，紐芬蘭政府單方面改稱自己為「紐芬蘭與拉布拉多政府」，同魁北克省關於拉布拉多歸屬嘅爭議亦都再次浮上水面。2001年，加拿大通過憲法修正案，正式將紐芬蘭省正式改名為「紐芬蘭與拉布拉多省」，確定咗紐芬蘭對拉布拉多嘅所有權。