細輕仔

細輕（heng1）仔，原題輕仔同佢亞媽，德文童謠，一八六〇年出版，一個先生作歌詞，當時德國尚未統一，眾邦林立。歌詞取材自一八三五年嘅一首詩，叫認人。本身歌詞三段，後人改詞，有二段版，有一段版。又本身故仔歌，再變唱遊歌。第三段，唱遊歌又有佢變化。原詞註腳嘅 ｢調寄去遠嘅嗰度｣，指嘅其實係十八世紀德法兩地間嘅一首獵歌嘅頭一句，佢嘅曲調有唔少歌改詞用，但係由於細輕仔變到好流行，好多時用佢名代表。

細輕仔像

一八七七年出版原詞

故仔第一段，話細輕仔年少離家，聞盪天下。出門時，細輕仔興高采烈，亞媽就喊晒咁。第二段細輕仔出去見過世面，過咗唔知幾年，都變大輕仔，樣都唔同晒，想返屋企。第三段，亞輕返家鄉，掂行掂過無人識佢。家姐細妹睇樣都唔知。然而亞媽一認就知亞仔返來。

一九〇〇年左近，德國就好興敎細蚊依支歌，幼稚園有敎，家教亦敎。就此有其他地方版本。支曲世界各地都出名，之不過有啲地方歌詞改到九唔搭八，面目全非。英文改寫到講扒艇，重有講雀講蠅。希伯萊文改講幼稚園。日文伊沢修二經英文傳入支曲，引入時話西班牙歌，至今有唔少日本歌書寫話西班牙。後尾野村秋足改做蝶蝶，講蝶飛，部份有歌頌日王，戰後一九四七年改詞去除，題改用平假名。韓文改自日文，都講蝶。中文有個版本小蜜蜂，講蜜蜂勤力，然而同名都幾個版本，何況又有其他名版本。同一種文都唔同改詞。香港戰後教育署出版小學生歌集，寫咗詞叫五月歌，雖則話德國民歌，都同原詞無關。就咁，道道甚至人人叫法不一。

常見曲式咁。之不過並非唯一變化。

文

德文名 Hänschen klein，廣東音似輕申解。德文為屈折語，字變形就化字義。Hans（類似粵拼：haan1 si̷4）本同英文 John 一樣，至終化自希伯萊文 יוֹחָנָן（類似粵拼：jou6 haa6 naan1），｢上帝係慈悲嘅｣ 咁解。而字尾 -chen 就為屈折，將字義化細，但係亦都將原字變音（Hans 變 Häns，類似粵拼：hen1 si̷4）。亞輕細咗就即廣東話輕仔，而 klein 就解細，即係細輕仔。