結合數據（粵音：git3 hap6 sou3 geoi3 | 英文：aggregate data）喺統計學上係指由將幾個個體嘅數據以某啲方式結合成嘅數據；例：有個經濟學家想研究一間公司嘅營業額同員工嘅工作表現有乜關係，佢一個可能嘅做法係，每間公司都搵若干個員工（個體），量度每個員工嘅工作表現（個體嘅數據；假設員工表現有方法量化），然後每間公司計個平均員工工作表現（以平均值嘅方式結合），再用統計分析睇吓每間公司嘅呢個數值同營業額之間有乜關係。
