統計學嘅誤用

統計學（粵拼：tung2 gai3 hok6）上嘅數據同分析方法對科研有巨大嘅幫助，但又時不時會俾人誤用。有人就曾經噉講：

同一樣嘅數據有得用唔同嘅方法呈現。

「

原版英文："There are three kinds of lies: lies, damned lies, and statistics." 粵文翻譯：世上有三種大話：大話、抵死嘅大話、同埋統計數字。

」

舉附圖嚟說明，同一樣嘅統計數據可以用唔同嘅方法呈現，而唔同嘅呈現方法可以攞嚟誤導人，好似係附圖嗰兩幅棒形圖噉，兩幅圖表達嘅數據一樣，都係表達緊一間公司喺 2010 同 2011 年嘅銷售量（Y 軸係銷售量，X 軸係年份），但係兩幅圖嘅原點唔同－左圖嘅 Y 軸係以 36 做起點，右圖嘅以 0 做起點，令到前者望落好似賺多咗好多錢噉。除此之外，對分析嘅結果又有得用唔同嘅方法解讀，搞到好多人會特登用對自己有利嘅呈現同解讀方法嚟誤導人，而美國作家達利哈夫（Darrell Huff）嘅書《How to lie with statistics》（粵文：點樣用統計學講大話）就揭露咗好多生意人同政治家等嘅人物用類似嘅詭計嚟呃人嘅例子。

要預防統計學嘅誤用有好多方法，包括要用啱嘅圖表等等。而且喺將用統計得出嘅結論普遍化嗰陣，要留意佢會唔會超出咗個樣本代表到嘅範圍，只有個當樣本可以代表到個總體嗰陣，統計方法得出嘅結果先至算係可信、精確嘅，例如係一份用白人做樣本嘅醫學研究得出嘅結論未必啱唐人用。