美屬處女羣島

美屬處女羣島（英文：Virgin Islands of the United States 或者 United States Virgin Islands，縮寫USVI或者VI，丹麥文：Amerikanske Jomfruøer），又譯做美屬維京羣島或者美屬維爾京羣島，係一群加勒比嘅島嶼，亦係美國喺加勒比海嘅一個非合併建制屬地（Organized Unincorporated Territory）。

美屬處女群島旗

美屬處女羣島地理上屬於處女羣島（英文：Virgin Islands archipelago）嘅一部份，位於細安地列斯群島（英文：Lesser Antilles）嘅背風群島（英文：Leeward Islands）入面，美屬處女羣島嘅東邊係美國嘅波多黎各自由邦（英文：Commonwealth of Puerto Rico），而美屬處女羣島嘅西邊就係英屬處女羣島。

美屬處女羣島係由聖克羅伊島（英文：Saint Croix Island）、聖約翰島（英文：Saint John Island）、聖湯馬士島（英文：Saint Thomas Island）三座主島，以及大大小小50座比較細嘅小島同島礁組成。美屬處女羣島嘅總面積為133.73平方英里（或346.36平方公里）。首府位於聖湯馬士島上面最大嘅城市莎樂阿馬利。

美屬處女羣島喺1754至1814年嘅丹麥-挪威聯合王國時期，以及1814年丹麥-挪威聯合王國解散後丹麥王國嘅時期，原本係叫丹屬西印度群島（丹麥文：Dansk Vestindien，英文：Danish West Indies），直到1917年丹麥根據《丹屬西印度群島條約》，以美金$25,000,000將群島賣畀美國之後改名，自此成為美國嘅其中一個非合併建制屬地。美屬處女羣島喺1954年根據《處女羣島建制修訂法》（英文：Revised Organic Act of the Virgin Islands）確立建制，至今舉行過6次美屬處女羣島制憲會議（1964年、1971年、1977年、1980年、2009年、2020年）。

截至2021年，美屬處女羣島估算人口為105,870，以非裔加勒比人後代為主。美屬處女羣島最主要嘅經濟活動為旅遊以及其相關行業。

語源

處女羣島呢個名係由探險家哥倫布喺1493年，根據聖烏蘇拉與11,000個處女嘅傅說，命名為「Santa Úrsula y las Once Mil Vírgenes」（中文：聖烏蘇拉與一萬一千處女）而嚟嘅。後嚟省略成為「處女羣島」。

歷史

内文：美屬處女羣島歷史

同歐洲人接觸前

位於聖約翰島上，處女羣島國家公園入面嘅古代石刻

美屬處女羣島最初嘅原住民係西波內人（英文：Ciboney）同阿拉瓦克人（英文：Arawak），有啲學者認為佢哋早喺公元前1000年以前已經喺島上居住。而加勒比人（英文：Kalinago或Carib）就大概喺公元1500年左右嚟到島上。

一般相信，第一個見到處女羣島嘅歐洲人，係喺1493年進行緊佢第二次遠航時嘅哥倫布，當其時哥倫布對處女羣島嘅稱呼，亦係今日處女羣島呢個名嘅由來。後嚟西班牙人喺1555年左右喺處女羣島度落腳，而英國同法國嘅移民就係喺1625年到達聖克羅伊島。再後嚟嘅時期就係由西班牙、法國、英國以及荷蘭各自所佔據各個島嶼嘅一段複雜嘅時期。

丹屬時期

内文：丹屬西印度群島

1833年，位於聖克羅伊島上嘅霍根斯堡莊園

丹麥-挪威聯合王國亦同樣對羣島抱有濃厚興趣，丹麥西印度公司喺1672年同1694年，分別喺聖湯馬士島同聖約翰島上落腳，並喺1733年向法國買起咗聖克羅伊島。群島喺1754年正式成為丹麥嘅殖民地，並被命名為丹屬西印度群島（丹麥文：De Ｄansk-Vestindiske Øer）。最初喺當地嘅貨幣叫丹屬西印度Rigdaler，後嚟喺1849年由daler所取代。島上嘅環境同氣候，被認為非常適合種植屬於產糖作物嘅甘蔗，於是當其時嘅丹麥就從非洲引入黑奴，並喺18世紀至19世紀早期大力發展當地嘅經濟。其餘嘅經濟作物包括棉花同藍染染料。而喺17至18世紀，亦有一定數量嘅猶太人喺丹屬西印度群島上面落腳。

地理

政治

執法部門

美屬處女羣島嘅執法係由美屬處女羣島警察局（英文：United States Virgin Islands Police Department，USVIPD）負責嘅。

經濟

人口統計

健康

2010年，美屬處女羣島嘅全國平均預期壽命為79.61年，男性預期壽命為76.57年，女性預期壽命為82.83年。

文化

出面網頁

• 美屬處女羣島嘅官方網站
• 美屬處女羣島喺中央情報局《世界概況》嘅資料 （英文）