群育學校

群育學校（粵拼：kwan4 juk6 hok6 haau6；英文：Schools for Social Development）係香港一類特殊學校，主要服務有情緒同行為問題嘅學生，入學途徑一般需要由教育局嘅「中央統籌轉介系統」做轉介。

支援服務

日間學位

適合入讀群育學校日間學位嘅學生可能喺以下方面出現同遇到問題：

• 學校
  • 唔遵守學校紀律，就算接受咗輔導之後仍然多次犯校規，例如打交同埋/或者破壞課室秩序，以致嚴重影響老師上堂。
  • 夾埋其他同學觸犯校規。
  • 公然反抗同侮辱校方。

• 屋企
  • 同父母關係惡劣。父母未能夠有效管教，或者同仔女經常有衝突。
  • 經常好夜都唔返屋企，並間中離家出走。
  • 經常同兄弟姊妹嗌交同打交。

• 個人/社交
  • 行為魯莽衝動，例如發脾氣、毀壞其他人嘅嘢或公物等。
  • 對其他人同埋/或者自己做出暴力同侵犯行為（例如輕微自殘行為）。
  • 自制能力薄弱，喺社交場合好多時都做出破壞秩序同滋擾嘅行為。
  • 參與不良分子嘅活動，並因此逃學同埋/或者做出犯法嘅行為。

院舍服務

學生除咗出現以上問題之外，如果有以下情況，就應該需要院舍服務：

• 屋企
  • 屋企照顧嚴重唔足夠、學生得唔到父母嘅接納或者懷疑受到虐待。

• 個人/社交
  • 活躍喺不良分子嘅活動，除非轉換環境以接受密集嘅生活技能訓練同受督導嘅日常照顧，唔係嘅話就會難以擺脫次文化嘅不良影響。

院舍課餘照顧服務

院舍課餘照顧服務係學生入住院舍前嘅一項緩衝、過渡同另類措施，切合日間缺乏家人照顧而有情緒同行為問題嘅男生嘅需要。

短期適應課程

一啲適合接受群育學校/院舍服務嘅學生，因為種種原因唔願意長期轉讀群育學校，又或者預期佢哋嘅問題可以喺接受服務之後嘅短期內得到改善，就可選擇入讀短期適應課程 。呢項服務一般為期三個月至一年，學生原先就讀嘅普通學校會保留佢哋嘅學籍，當呢啲學生喺群育學校/院舍完成短期適應課程而行為有改善嘅時候，就可以返去原校讀書。

一覽

學校名	地址	開辦級別	對象
瑪利灣學校	香港香港仔黃竹坑南朗山道32號	小五至中六	行為情緒有困擾嘅女學生
明愛樂恩學校	九龍觀塘彩興路20號	中一至中六	因為家庭關係、個人行為或情緒上面臨困難、有特殊教育需要嘅青少年女學生
明愛培立學校	九龍清水灣道6010地段	小五至中三	因為學校或家庭面臨適應困難，而暫時唔適宜喺一般中學就讀嘅女學生
香港扶幼會盛德中心學校	九龍觀塘利安里2號A	小五至中六	有學習障礙、過度活躍、情緒行為問題嘅男學生
香港扶幼會則仁中心學校	九龍深水埗歌和老街47號	小三至中六	有學習障礙同情緒行為問題嘅男學生
東灣莫羅瑞華學校	屯門旺賢街12號	小二至中六	行為同情緒發展上遇到障礙而未能夠喺普通學校教育獲益嘅男學生
香港扶幼會許仲繩紀念學校	九龍長沙灣東沙島街150號	小五至中六	有特殊學習需要、或情緒行為問題嘅男學生
香港青少年培育會陳南昌紀念學校	香港黃竹坑南朗山道38號	中一至中六	情緒行為同適應有困難嘅男學生

睇埋

• 香港特殊學校一覽

出面網頁

• 香港教育局：群育學校／院舍服務