大王爺廟 (翠屏邨)
(由翠屏邨大王爺廟跳轉過嚟)
官塘大王爺廟係香港嘅一間廟，喺觀塘翠屏南邨天主教佑華小學後山上面。大王爺廟原本喺樂富，1958年因為社區嘅發展被迫拆咗，善信就要求政府批地起過座。最後新嘅大王爺廟喺1963年得到香港政府撥地喺而家呢度起咗，而且由私人嘅公司「德教保慶愛壇有限公司」負責打理。門額上寫住「大王爺古廟」，兩旁嘅對聯就寫住：「養天地正氣；法古今完人」。
歷史
編輯一個姓李嘅將軍喺宋末跟隨宋帝昰同宋帝昺逃避元軍而南下，隨身帶埋佢嘅祖宗李文忠公（唐朝嘅忠臣）神主牌南下。其後被元兵打敗，就將祖宗嘅神主牌安置喺「老虎岩」（即今日嘅樂富）。流傳話李文忠公經常顯靈，重救治當地嘅村民啲疾病，於是就起廟供奉，善信亦越來越多。